Janë zbardhur detaje të reja në lidhje me krimin tragjik që ndodhi më 1 shkurt në Kodrën e Priftit, Tiranë, ku 74-vjeçari Hekuran Gjoni vrau me thikë djalin e tij, Asim Gjonin.
Hetimet kanë zbuluar se arsyeja e konfliktit mes tyre ishte pronësia e banesës.
Familja Gjoni jetonte në një ndërtesë trekatëshe, ku Hekurani kishte ndarë katin e parë për secilin nga djemtë e tij me një akt dhurimi.
Konflikti nisi rreth një muaj më parë, kur vajza e vogël e Hekuranit, e sapodivorcuar, kërkoi një pjesë të katit të parë për të jetuar me prindërit. Kjo kërkesë shkaktoi tensione brenda familjes, çka çoi në përshkallëzimin e mëtejshëm të situatës.
Tre ditë para ngjarjes, Hekurani kërkoi nga djemtë e tij dokumentet e pronësisë, gjë që shkaktoi debate të ashpra. Më 1 shkurt, gjatë një përplasjeje të dhunshme verbale dhe fizike, 74-vjeçari goditi me thikë djalin e tij, duke i shkaktuar vdekjen.
Motra e viktimës, e cila ishte e pranishme gjatë ngjarjes, fillimisht deklaroi se të dy ishin nën ndikimin e alkoolit, por kjo nuk është konfirmuar nga hetimet.
Gjatë përleshjes ajo ka mbetur e lënduar dhe është dërguar në spital për trajtim, por më pas u kthye në shtëpi dhe nuk mori pjesë në varrimin e të vëllait.
