Nënkryetari i Partisë Demokratike, Oerd Bylykbashi, shprehet se aksioni opozitar do të vazhdojë përmes mosbindjes civile dhe përplasjes parlamentare për të bërë të dëgjohet zëri i qytetarëve.
Ai tha në një intervistë për emisionin “Kjo Javë” në News24 se grupi parlamentar i PD-së ka marrë një vendim politik për të reaguar fuqishëm në parlament, duke përfshirë debatet e ashpra për buxhetin dhe problematikat e qytetarëve.
Bylykbashi theksoi se qëllimi i aksionit opozitar është për të evidentuar problemet e qeverisjes dhe korrupsionin, duke sjellë vëmendje ndaj abuzimeve financiare dhe projekteve të dyshimta, si porti i Durrësit dhe inceneratorët.
Ai theksoi se nga xhepat e qytetarëve janë marrë miliona euro për projekte të cilat nuk përmirësojnë jetën e shqiptarëve, ndërsa pensionet dhe pagat mbeten të ulëta.
Deputeti i PD-së bëri të qartë se opozita ka ndërmend të ndjekë një strategji të qëndrueshme për t’i kundërshtuar këto praktika në parlament dhe në terren, duke përfshirë dhe protestat e mosbindjes civile.
Ai deklaroi se për opozitën është thelbësore të përfshihet gjithë spektri i veprimeve, me qëllim që çështjet e ngritura të sjellin një efekt të dukshëm te qytetarët dhe faktori ndërkombëtar.
