Mbledhja e së enjtes e Komisionit Hetimor për Shëndetësinë, e cila synon të hetojë koncesionet dhe Partneritetet Publike-Private (PPP) në këtë sektor, është shoqëruar me debate të forta ndërmjet anëtarëve të tij. Debati ka nisur mbi procedurat dhe mënyrën e funksionimit të komisionit, sidomos rreth cili anëtar duhet të marrë fjalën së pari.
Kryetarja e Komisionit, Albana Vokshi, është përballur direkt me deputetin Petro Koçi. Vokshi ka bërë të qartë se çdo veprim i komisionit duhet të bazohet në provat e grumbulluara dhe në një plan të qartë hetimi.
“Në asnjë rast plani nuk miratohet pa marrë ende provat. Ne kemi kërkuar ngritjen e komisionit, kemi një objekt të komisionit, kemi bërë planin paraprak, pra si do të hetohet sipas kërkesës së opozitës. Niset me kërkesat për informacion më pas kalohet plani,” theksoi Vokshi në një debat të tensionuar. Ajo shtoi, “Ju keni depozituar një plan krejt ndryshe nga ai parapraku, do ta lexojmë dhe diskutojmë dhe është edhe pjesë e rendit të ditës.”
Gjatë debatit, Vokshi gjithashtu ka kritikuar ashpër sjelljen e Koçit në mbledhjet e mëparshme, duke e akuzuar për sjellje të papërshtatshme: “Petro mos e ngri zërin me mua dhe asnjë koleg ke vepruar në mënyrë të turpshme në mbledhjen e kaluar. Lëri zhurmuesit. Zhurmueset t’ia lënë Rai 3 jo këtu. Unë jam mbi palët këtu!”
Vokshi kishte akuzuar ditën e mëparshme se socialistët po bllokojnë punimet e komisionit duke bërë pengesë për miratimin e kërkesave për informacion, drejtuar institucioneve. “Dje në një dalje për mediat, kam akuzuar socialistët se po bllokojnë punimet dhe po bëhen pengesë për miratimin e kërkesave për informacion,” deklaroi ajo.
Ky komision ka për qëllim të adresojë çështjet e transparencës dhe efikasitetit të kontratave në sektorin shëndetësor, por fillimi i tij është penguar nga mosmarrëveshjet politike dhe procedurale.
