Ambasadorja e SHBA, Yuri kim, ka reaguar sërish ashpër lidhur me zgjedhjet që priten të mbahen më 25 prill.
Me anë të një postimi në Twitter, Kim iu ka bërë thirrje qytetarëve të raportojnë dhe denoncojnë çdo rast shkelje apo blerje të votës.
“Mos e shit të drejtën tënde. Mos ia dorëzoni fuqinë tuaj kriminelëve. Vetëm TI duhet të zgjedhësh të ardhmen tënde.”, shkruan Kim.
Ambasadorja amerikane ka udhëzuar qytetarët tek “Portali i denoncimeve” të Komisionit Qendror të Zgjedhjeve.
Kim ka reaguar edhe më herët për zgjedhjet dhe listat e kandidatëve për deputetë. Ajo ka folur me emra teksa ka përmendur Tom Doshin, si një ndër deputetët e lidhur me krimin.
Në reagimet e njëpasnjëshme të Kim në rrjetet sociale, ajo ka publikuar dhe raportin e DASH, që e shpallte Doshin “non-grata”, duke i ndaluar kështu hyrjen në Amerikë Doshit dhe familjes së tij.
I fundit reagim i Yuri Kim ishte thirrja që ambasadorja e SHBA iu drejtoi drejtuesve politikë, ndërsa theksoi se të heshtësh ishte njësoj sikur të ishe aleat.
“Ne theksojmë se Partia Demokratike dhe të tjerët nuk duan që në Parlament të jetë dikush i shpallur nga SHBA si non-grata për korrupsion domethënës.Për të tjerët: Nga se keni frikë? A është e ‘dobishme’ që të heshtni? Pse i lini njerëzit të mendojnë se jeni ‘aleatë’? A është kjo ajo që meritojnë votuesit shqiptarë? Shqipëria meriton më mirë”, shkruan ajo.
Por pavarësisht kërkesave të SHBA për ndalimin e pjesëmarrjes në zgjedhje, KQZ e pranoi kandidimin e Partisë Social Demokrate, me në krye vetë Tom Doshin.
