Kryetarja e Lëvizjes Socialiste për Integrim, Monika Kryemadhi ka vendosur të marrë mandatin si deputete në qarkun e Fierit, duke hequr dorë kështu nga Tirana. Kryemadhi i ka kthyer përgjigje Komisionit Qendror të Zgjedhjeve, ku ndër të tjera ka specifikuar se do të marrë mandatin që fitoi në qytetin e Fierit. Automatikisht mandati i qarkut të Tiranës i kalon nënkryetarit të LSI-së, Petrit Vasili, i cili ishte i treti në listën e Lëvizjes Socialiste për Integrim, për kryeqytetin.
Me marrjen e mandatit të Fierit nga Kryemadhi, i hiqet shansi për të hyrë në Parlament Keidi Mehmetajt. Gjithashtu kujtojmë se në zgjedhjet e zhvilluara në 25 prill, Monika Kryemadhi garoi në tre qarqe, Tiranë, Fier, dhe Elbasan, ku rezultoi fituese në dy të parët. Katër deputetët e rinjë të LSI-së do të jenë, Monika Kryemadhi, Erisa Xhixho, Petrit Vasili dhe Agron Çela.
Letra e Kryemadhit drejtuar KQZ:
I nderuar zoti Celibashi,
Në përgjigje të kërkesës tuaj me nr. 8542, prot, datë 17.06.2021 dhe nr. 486 prot, datë 17.06.2021, ju bëj me dijeni se:
Në zbatim të Kodit Zgjedhor të Republikës së Shqipërisë, neni 67, pika 3, shpreh vullnetin tim duke zgjedhur mandatin e deputetit të Lëvizjes Socialiste për Integrim në Qarkun e Fierit.
Duke ju falënderuar për bashkëpunimin Tuaj.
