Kryetarja e LSI, Monika Kryemadhi mesa duket aspiron që pas zgjedhjeve të 25 prillit të ketë postin e Ministres së Brendshme.
E pyetur nëse ka biseduar me kreun e PD, Lulzim Bashën, Kryemadhi nuk e mohoi mundësinë e një posti të tillë, madje tha se do të ishte mirë pasi do të sistemonte rendin siç bën me shtëpinë e saj.
Më tej Kryemadhi tha se ende nuk ka biseduar me Bashën lidhur me këtë temë, pasi po presin përfundimin e zgjedhjeve.
PJESË NGA BISEDA:
Metaj: Më herët ju keni thënë se nuk kërkoni poste, por më pas qarkulluan disa mesazhe që Meta mund të jetë ministër i Brendshëm i Shqipërisë. Ndërkohë ai e mohoi këtë gjë dhe tha se do jetë president deri në vitin 2022. Mos ndoshta do të jeni ju ministre e Brendshme në qeverinë e ardhshme? Duke qenë se jeni shprehur që do fitoni patjetër dhe ndoshta i keni ndarë postet me Bashën?
Kryemadhi: Nuk do ishte keq se do sistemohej ashtu siç një grua sistemon shtëpinë e saj do sistemonte dhe këto çorapet e mëdha siç i ka Rama çorapet e kuqe që i bën lëmsh. Nuk kemi folur për postet dhe ministritë. Sot është e rëndësishme përpjekja dhe hyrja në finishin e fundit të kësaj fushate sfilitëse për ne dhe shqiptarët. Angazhimi ynë është të cojmë shqiptarët të votojnë, nga jashtë shtetit, përsa i përket ndarjes së posteve. Mos mendoni se qytetarët e kanë problem këtë gjë se çfarë posti merr Kryemadhi.
Peka: E përjashtoni marrjen e një posti ekzekutiv?
Kryemadhi: Kush e tha se kam thënë ma gjeni mua këtë? Ka kohë, varet nga numrat.
