Protesta e zhvilluar para godinës së Parlamenti i Shqipërisë u përshkallëzua në skena dhune, pasi në drejtim të kordonit të policisë u hodhën bomba molotov, fishekzjarrë dhe sende të forta.
Flakët shpërthyen mes efektivëve, duke djegur uniformat e policisë dhe duke shkaktuar panik në vijën e parë të sigurisë. Pamjet nga protesta tregojnë qartë momentet kur molotovët bien në mes të kordonit, ndërsa disa punonjës policie pësojnë djegie në trup. Njëri prej tyre nuk është ndjerë mirë dhe është larguar nga vendi i protestës për ndihmë mjekësore.
Molotovët dhe mjetet piroteknike u hodhën papritur nga protestuesit e Partisë Demokratike, duke e kthyer tubimin në një përplasje të dhunshme me forcat e rendit. Policia reagoi me ujë dhe gaz lotsjellës për të shpërndarë turmën dhe për të shmangur përshkallëzimin e mëtejshëm të situatës.
Sipas informacionit zyrtar, nga sulmet me bomba molotov, lëndë piroteknike dhe sende të forta, u lënduan gjithsej katër punonjës policie. Tre prej tyre janë transportuar për ndihmë mjekësore, pasi kanë pësuar djegie dhe dëmtime fizike.
Bilanci i protestës flet për katër efektivë të plagosur dhe për një situatë të rënduar sigurie para Parlamentit, ku flakët, gazi dhe uji shënuan kulmin e një tubimi që përfundoi në dhunë.
