2 mjekë dhe një infermier janë shoqëruar pasi është zbuluar se mjekuan në banesë Nuredin Dumanin duke mos e kallëzuar në polici.
Ndërkohë që është zbardhur dëshmia e dy mjekëve dhe infermierit të arrestuar nga policia pasi i dhanë ndihmë mjekësore Nuredin Dumanit dhe nuk njoftuan policinë. Mjekët nga Fieri kanë deklaruar se nuk kishin dijeni për të shkuarën e tij kriminale dhe se kanë bërë detyrën e tyre, bazuar dhe në betimin e Hipokratit.
“Kemi shkuar te banesa e personit të plagosur të shoqëruar nga një i njohur. Nuk kishim dijeni për të shkuarën e tij kriminale. Kemi bërë detyrën si mjekë për t’i ofruar ndihmën paraprake të shpejtë një njeriu. Kjo bazuar edhe në betimin e Hipokratit si profesionistë dhe në çfarëdo lloj situate që të ndodhemi nuk mund t’i mohojmë kujdesin shëndetësor askujt”, kanë deklaruar ata gjatë dhënies së dëshmisë në polici.
Tre mjekët dhe 20-vjeçarja nga Kosova, e dashura e Dumanit do dalin nesër para trupit gjykues në Elbasan ku do t’u komunikohet masa e sigurisë. Ndërsa Dumanit do t’i komunikohet masa e sigurisë në spital.
Kujtojmë që sipas informacioneve të siguruara, Dumani ka qenë i armatosur dhe i plagosur në momentin e arrestimit nga forcat speciale “RENEA”.
Nuredin Dumani dyshohet se ka ekzekutuar vëllain e Bujar Çelës në Elbasan, si shkak i përplasjes së grupeve kriminale për prishjen e pazareve të drogës. Ai ka qenë i shpallur më parë në kërkim për vrasjen e vëllezërve Viktor dhe Besmir Haxhia në Durrës.
