Coronavirusi ka bllokuar tashmë Europën, teksa paniku rritet çdo ditë e më shumë.
Në vendin fqinj, Itali, situata duket shumë shqetësuese pasi numri i viktimave rritet ndjeshëm çdo ditë dhe deri tani janë shënuar 148 viktima dhe mbi 3800 të infektuar.
Mbrëmjen e sotme, mjeku shqiptar Albert Troci, i cili punon në një spital ku është vendosur karantina në Itali, ka dhënë një intervistë telefonike për ‘Opinion’.
Troci ka folur për situatën e krijuar dhe për rrezikun e infektimit nga Coronavirusi, teksa shprehet se ai ka qarkulluar edhe më përpara se të identifikohej pacienti i parë, ndërsa infektiviteti është shumë i lartë, pasi edhe personat që nuk shfaqin simptoma mund të infektojnë të tjerë.
Ndër të tjera mjeku shprehet se në Itali janë marrë masa të rrepta për parandalimin e Covid-19.
“Spitali ka pësuar një transformim total, po përqëndrohet e gjitheë fuqia e spitalit te pacientët që kanë nevojë. Italia ishte e para që mori masa të rrepta, të cilat nuk u mbështetën. Ky është një virus ku 80% që nuk japin shenja infeksioni mund të infektojnë të tjerët. Numri i qelizave virale në pacientët e sëmurë është shumë i lartë.
Në Itali numri i të moshuarve është shumë i lartë. Virusi ka sjellje të cuditshme, ka qarkulluar më përpara se sa data e diagnostifikimit të parë. Ky virus ka dy lloje mënyre sjellje, në disa pacientë jep sindroma të rënda. Ajo që po mundohet që të bëjë politika me atë që i thotë komuniteti shkencor është të ulim numrin e infektimit, pasi 1 person infekton 1 deri në 2.5 persona, dhe mënyra për të ulur infektivitetin është të marrim masa shumë të forta. Në të gjithë Italinë ka 4000 shtretër për terapitë intensive. Mund të them në mënyrë informale që ka pasur shqiptarë që kanë patur simptoma të njëjta, por me sa di unë nuk ka raste të shqiptarëve të infektuar me koronavirus”, tha Troci ndër të tjera.
Në rang global numri i të infektuarve ka shkuar në 97 mijë, ndërsa janë regjistruar më shumë se 3300 viktima.
Fatmirësisht, në vendin tonë nuk është shënuar asnjë person i prekur nga virusi, teksa mbi 40 raste të dyshuara kanë rezultuar negativ.
Ditën e djeshme, mjeku i njohur Tritan Kalo u shpreh tejet optimist, teksa shtonte se Shqipëria do ia dalë mbanë edhe me rrezikun e ri që i kanoset prej virusit COVID-19, ndërsa u kërkoi qytetarëve që të mos dyshojnë më për Coronavirusin, por të kenë besim tek mjekët dhe shumë shpejt kjo situatë do kalojë.
Kalo rendit dhe arsyet se pse Shqipëria nuk është prekur ende nga Coronavirusi dhe janë plot 8 të tilla, që mund t’i lexoni në artikullin e mëposhtëm:
Pse Shqipëria nuk është prekur nga Coronavirusi? Ja 8 arsyet që jep mjeku shqiptar
