Gjykata e Tiranës ka reaguar në lidhje me veprimin e mjekut Edmond Gashi, i cili akuzohet se drejtonte pacientët nga spitali Onkologjik drejt klinikës së tij private dhe tani është vendosur në arrest shtëpie. Pas përfundimit të seancës gjyqësore, Gashi u largua me vrap nga ambientet e gjykatës për t’i shpëtuar kamerave, duke përfituar nga një moment i vetëm kur një punonjëse e gjykatës po dilte rastësisht nga dera e autorizuar për hyrje dhe dalje të gjyqtarëve. Ai u largua pa shoqërimin e policisë.
“Me përfundimin e seancës gjyqësore, pasi gjyqtarja ka lënë sallën e gjyqit, po kështu me rradhë pas saj edhe prokurori, avokatët, si dhe vetë personat nën hetim, shtetasi E. G., teksa ka qënë në korridorin e katit të parë të gjykatës, duke përfituar nga një moment i vetëm në të cilin një punonjëse e gjykatës ka qënë duke dalë në rrethana krejtësisht rastësore nga dera e cila shërben për hyrjet dhe daljet e autorizuara vetëm të gjyqtarëve dhe punonjësve të gjykatës (me karta të posaçme), ka dalë i shoqëruar edhe nga një shtetas tjetër, duke u larguar me vrap, i pa shoqëruar nga asnjë punonjës i policisë së shtetit“, thuhet në reagimin e Gjykatës.
