Një tjetër mjek ka humbur jetën ditën e sotme si pasojë e infektimit me COVID-19. Rustem Keko, mjek në spitalin e Përmetit, ku shërbeu për plot 50 vite, nuk arriti të fitonte betejën me virusin. Mësohet se mjeku ishte prej katër ditësh i shtruar në Spitalin Infektiv në gjendje të rëndë shëndetësore.
Për ndarjen nga jeta të Kekos ka reaguar edhe ministrja e Shëndetësisë Ogerta Manastirliu. Në një postim në rrjetet sociale ajo shkruan se Rustem Keko i dedikoi jetën spitalit të Përmetit deri pak ditë para se të shtrohej në Spitalin Infektiv. Manastirliu shkruan se mjeku ka lënë një dhimbje të madhe për familjarët dhe një boshllëk të pazëvendësueshëm në spitalin e Përmetit e për qytetarët të cilëve iu shërbeu me përkushtim.
Postimi i Ogerta Manastirliut.
Dr. Rustem Keko i dedikoi jetën spitalit të #Përmetit, ku shërbeu për 50 vite, deri pak ditë më parë kur u shtrua në spitalin infektiv si pasojë e #COVID19.
Virusi i pabesë nuk e kurseu mjekun pneumolog, megjithë kujdesin e stafit mjekësor të spitalit #COVID1, duke lënë një dhimbje të madhe për familjen e dr. Rustemit dhe një boshllëk të pazëvendësueshëm për spitalin e Përmetit e për përmetarët, të cilëve u shërbeu me përkushtim.
U prehsh në paqe dr. Rustemi
