Pavarësisht se prej muajsh e gjithë bota po lufton kundër Covid-19, ka ende shumë të paditura rreth tij.
Nga 9 marsi e deri tani në vendin tonë janë identifikuar 766 të infektuar, nga të cilët 455 janë shëruar, teksa mbrëmjen e sotme ka shkuar në 31 numri i viktimave.
Specialistë të ndryshëm kanë deklaruar se përveç valës së parë, e cila do zbehet me rritjen e temperaturave, në vjeshtë do kthehet vala e dytë e virusit.
Mjeku epidemiolog Ilir Alimehmeti, në një lidhje me “Open” tha se një fazë e dytë e koronavirusit pritet të rikthehet në kushte adapte.
“Do ketë një valë e dytë dhe kjo do ndodhë në momentin që do shfaqen kushtet adapte. Pra, ne nëse e zhdukim në Shqipëri komplet këtë virus, do hapen kufijtë dhe mund të ketë një valë të dytë. Me uljen e temperaturave në vjeshtë-dimër do kemi një rritje të rasteve. Siç kemi tani një ulje të rasteve me rritjen e temperaturave, atëherë mund të kemi ngritje”, u shpreh mjeku dhe shtoi “Sa më e fortë është vala e parë, aq më e dobët është vala e dytë.”
Alimehmeti ka thënë se në mënyrë që Shqipëria të ketë një valë të dytë sa më të dobët, duhet të masë sa % e popullatës ka qenë në kontakt me virusin.
Sipas tij, vendet që kanë patur një luftë të ashpër gjatë valës së parë, si Italia apo Spanja, do kenë një situatë shumë më të lehtë në fazën e dytë.
“Pra do ketë dhe një fazë të dytë. Për Italinë dhe Spanjën do jetë më e butë se popullata atje është njohur, ka pasur kontakt me virusin. Kurse në Shqipëri ne duhet të mësojmë sa % e popullatës sonë ka hyrë në kontakt me virusin”, ka thënë mjeku epidemiolog Ilir Alimehmeti.
