Aparatet e oksigjenit që tregtohen në farmacitë e vendit kanë kapur çmime rekord, ndaj për këtë, shumë familjarë të pacientëve me COVID të cilët nuk kanë besim tek spitalet dhe kurohen në shtëpi, po u drejtohen pikave të saldimit.
Aty bombolat me oksigjen mbushen dhe përshtaten në mënyra artizanale për t’ju instaluar edhe një aparaturë e cila u vendoset atyre më pas bashkë me maskën e oksigjenit.
Por këto montime artizanale dhe aspak profesionale, rrisin rrezikun e shpërthimit të bombolave të oksigjenit, duke bërë që pacientët të cilët kurohen nëpër shtëpi dhe familjarët e tyre, të jenë në një rrezik konstant nga këto pajisje.
Autoritetet e Zjarrfikësve, Inspektorati i Metrologjisë dhe Kalibrimit, por po ashtu dhe Autoriteti i Konkurrencës, deri tani as që kanë lëvizur as gishtin e vogël ndaj kësaj tregtie spekulative dhe të rrezikshme, e cila u rrezikon familjeve jetën më shumë se sa COVID-i.
Të parët, Policia e Zjarrfikëses dhe Inspektorati i Metrologjisë, duhet të konstatojnë në terren se sa të sigurta janë pikat e mbushjes së bombolave, vetë bombolat, si dhe cilësia dhe sasia e oksigjenit.
Ndërsa detyrë imediate e Autoritetit të Konkurrencës është kontrolli i tregut farmaceotik, i cili duke përfituar nga amullia e institucioneve shtetërore por dhe nga zakoni i ri i të kuruarit në shtëpi, kanë nisur spekulimet masive me çmimet si të medikamenteve ashtu dhe të aparaturave të oksigjenit dhe të të gjitha pajisjeve që shërbejnë për të kuruar Covidin.
Referuar të dhënave të ditëve të fundit nga mediat, bombolat me oksigjen janë artikulli më i kërkuar dhe më i kushtueshëm aktualisht në “tregun e Covid-it”.
Treg i rrezikshëm dhe kaotik
Të nevojshme për funksionimin e mushkërive te të sëmurët, përdorimi i tyre është kthyer në alarm për autoritetet shëndetësore. Në rrethe situata është bërë edhe më kaotike.
Nga një vëzhgim i bërë në Fier, është vërejtur se qindra të sëmurë trajtohen me oksigjen nëpërmjet bombolave të improvizuara. Jashtë kamerave dhe mikrofonave të mediave, farmacistët kanë pohuar se aparatet e oksigjenit janë shumë të shtrenjta, duke i udhëzuar të sëmurët drejt pikave të saldimit.
Mediat kanë vëzhguar disa pikat e licencuara saldimi në Fier. Në të dyja njësitë furnizohen me oksigjen 80 deri në 100 pacientë në ditë.
Janë bombola të destinuara për të furnizuar me oksigjen pajisjet e saldimit, por tani me pandeminë janë shndërruar në aparate frymëmarrjeje që blihen nga familjarë dhe instalohen në banesa.
Sa kushton oksigjeni
Mbushja e një bombole artizanale me oksigjen në pikat e saldimit ose të mbushjes me oksigjen, kushton 12 mijë lekë (të vjetra) dhe përdorimi i saj nuk zgjat më shumë se 6 orë.
Ato mbushen në Tiranë dhe më pas shiten nëpër rrethe. Janë vetë shitësit që janë bërë “mjeshtra” dhe të tregojnë se si funksion bombola.
Për mbushjen dhe sigurinë e bombolës ata të japin madje edhe “garanci”, ndërsa për nivelin e oksigjenit që duhet të marrë i sëmuri, natyrisht që nuk flasin dot.
“Bombolat janë me kolaudim”,- thonë gjithmonë shitësit kur pyeten., në një kohë që pranojnë se kërkesat janë të shumta.
“Nuk mund t’u përgjigjet dot të gjithë të sëmurëve me Covid. Edhe me kaq nuk ia dalim dot. Kemi shumë kërkesa”,- thonë ata.
Një shitës tjetër në Tiranë flet edhe për incidentin që i ndodhi të moshuarit, i cili rrezikoi jetën për shkak të përdorimit të bombolës së oksigjenit në shtëpi.
“Ajo që ndodhi mbrëmë, do të ketë pasur ndonjë ngrohtësi afër, s’ka mundësi tjetër. Ose ka qenë e pisët bombola. Mund të ketë pasur gaz tjetër brenda, ka mbaruar dhe e kanë mbushur me oksigjen. S’ka lidhje me oksigjenin, oksigjeni nuk jep probleme”,- thotë shitësi tashmë “ekspert”.
Por ata që përdorin bombola me oksigjen duhet të kenë parasysh se ambienti ku mbahet bombola dhe i sëmuri për pasojë, duhet të jetë i mirëajrosur, i ftohtë dhe ajo që është më e rëndësishmja, të mos ketë pranë objekte që lëshojnë nxehtësi, flakë, apo që mund të shkaktojnë shkëndija, pasi në të kundërt fati i tyre do të ishte fatal.
/Video: Abcnews.al/Përshtati: GazetaReforma.com/
