Detaje të reja janë zbuluar lidhur me zhdukjen e shtetasit australian Cameron Twiss, i cili ka humbur kontaktet që nga tetori i vitit të kaluar, duke alarmuar familjen e tij.
Rasti është trajtuar gjatë emisionit “Zemër të Hapur”, ku u bë e ditur se Cameron kishte qëndruar me çiftin Mikel Vuksanaj dhe Irene Gjoni, pronarë të një hoteli në Shkodër.
Më 11 tetor, Cameron ka darkuar në shtëpinë e Mikel Vuksanajt, me pesë shqiptarë, përfshirë bashkëshorten e tij dhe dy nipërit. Më 12 tetor, ai u vendos në bujtinën “Kol Gjoni” në Valbonë, i shoqëruar nga Mikel Vuksanaj dhe një nga nipërit.
Në datën 13 tetor, rreth orës 05:30, Mikel Vuksanaj, nipi i tij dhe Cameron së bashku me një grup prej 50 shqiptarësh, u nisën nga Tirana drejt majës më të lartë në Shqipëri.
Rreth orës 07:00, Cameron shprehu dëshirën për të shkuar direkt në Theth dhe vendosi të ndahej nga grupi, që po ndiqte shtegun drejt majës. Ai pritej të mbërrinte në Theth rreth orës 11:00 për të ngrënë drekë dhe më pas të kthehej në Valbonë.
Cameron ka shkëmbyer mesazhe zanore me dy miq dhe një shok tjetër, duke përfshirë mesazhin “Mendova se do më vrisnin”. Të gjitha informacionet rreth zhdukjes janë dorëzuar në Policinë e Shkodrës, por familjarët e tij shprehen se autoritetet nuk kanë treguar ndonjë interes.
Rrobat, laptopi dhe pasaporta e Cameron mbetën në shtëpinë e Mikel Vuksanajt. Kërkimet intensive në terren dhe me dronë nuk dhanë rezultate.
Vëllai i Cameron udhëtoi në Shqipëri dhe u takua me shefat e Policisë në Shkodër dhe Bajram Curri, por thotë se ka shumë pak informacion në lidhje me zhdukjen e vëllait të tij.
Lidhja telefonike e Cameron u bllokua disa ditë pas zhdukjes, pas përpjekjeve të pasuksesshme për të hyrë në telefonin e tij.
