Një ngjarje makabre ka tronditur opinionin publik në Itali. 22-vjeçarja shqiptare Ilaria Sula, e shpallur e humbur që prej 25 marsit, është gjetur e pajetë mëngjesin e djeshëm në një zonë pyjore 40 kilometra larg Romës.
Trupi i saj ishte futur në një valixhe dhe më pas ishte hedhur në një luginë.
Hetimet zbuluan se autor i vrasjes është ish i dashuri i saj, Mark Antony Samson, një 23-vjeçar me origjinë filipinase dhe student për arkitekturë. Pas disa orësh marrje në pyetje, ai pranoi krimin dhe u arrestua, duke u akuzuar për vrasje me dashje dhe fshehje të kufomës.
Sipas hetimeve, Ilaria dhe Samson ishin takuar në një parking pranë shtëpisë së tij natën kur ajo u zhduk.
Dyshohet se pas një debati të ashpër, i riu e ka goditur me thikë disa herë dhe më pas ka fshehur trupin në një valixhe. Pasi e transportoi me makinë, ai e hodhi trupin e saj në një zonë të pyllëzuar jashtë Romës.
Ngjarja ka marrë një kthesë akoma më të errët kur u zbulua se Samson, pas vrasjes, kishte shkuar te miqtë e Ilarias për të pyetur rreth saj, duke u përpjekur të fshihte çdo dyshim.
Ai madje kishte përdorur telefonin e viktimës për të postuar mesazhe në rrjetet sociale, duke krijuar idenë se ajo ishte ende gjallë.
Policia italiane ka sekuestruar tabulatet telefonike dhe kamerat e sigurisë për të rindërtuar të gjithë dinamikën e ngjarjes.
Hetuesit po kërkojnë ende armën e krimit një thikë që dyshohet se është hedhur në një kazan plehrash në Romë si dhe celularin e viktimës, që mendohet të jetë hedhur në një pusetë.
Ndërkohë, prindërit e Samson janë vënë gjithashtu nën hetim për të parë nëse kanë qenë në dijeni të krimit ose kanë ndihmuar në fshehjen e tij.
Familja e Ilarias, e cila jeton në Terni, është e shkatërruar nga lajmi tragjik. Babai i saj, Flamur Sula, ka treguar se kishte marrë disa mesazhe nga telefoni i vajzës pas zhdukjes, por kishte dyshuar se diçka nuk shkonte. “Nëse do të ishte vajza ime, do të më kishte telefonuar,” tha ai.
Vëllai i saj, Leon Sula, u shpreh i tronditur: “Nuk e kuptojmë pse e bëri. Ata ishin bashkë për një vit, por ishin ndarë. Nuk na kishte treguar për ndonjë problem.”
Universiteti La Sapienza, ku studionte Ilaria, ka reaguar duke dënuar këtë akt brutal dhe duke e cilësuar atë si një tjetër tragjedi e dhunës ndaj grave.
Studentët e universitetit kanë mbajtur homazhe në nder të saj, duke tundur çelësat në shenjë proteste kundër femicidit.
Hetimet vijojnë për të zbuluar më shumë detaje mbi këtë krim makabër, ndërsa familja e Ilarias kërkon drejtësi për humbjen e vajzës së tyre.