Mjeku Edvin Prifti ka bërë një deklaratë të fortë lidhur me origjinën e virusit SARS-CoV-2, duke theksuar se e vërteta rreth krijimit të këtij virusi po del në dritë. Në postimin e tij, Prifti akuzon Peter Daszak, president i EchoHealth Alliance, si projektuesin e virusit që shkaktoi pandeminë COVID-19.
“Ka ndodhur shpesh që e vërteta të fshihet, që ata që e mbrojnë të shtypen, por në fund ajo triumfon mbi çdo intrige apo injorancë,” shkruan Prifti. Ai pretendon se Daszak dhe kolegët e tij në New York dhe Wuhan projektuan një virus kimerik në vitin 2018 dhe prezantuan projektin në DARPA në vitin 2017.
Sipas Priftit, Daszak pranoi në një seancë dëgjimore në Senatin Amerikan në maj 2024 se kishte krijuar virusin si pjesë e projektit Deffuse. Megjithatë, ai mohoi çdo përfshirje në ngjarjet pasuese. “Fatmirësisht, administrata Biden ka ndërprerë çdo financim për EchoHealth Alliance me një urdhër ekzekutiv më 22 maj 2024,” thekson Prifti.
Në postimin e tij, Prifti pretendon gjithashtu se pandemia u shkaktua nga modifikimet e Daszak që bënë koronavirusin më të transmetueshëm. Ai përmend se administrata amerikane ka nisur veprime kundër Daszak, të cilin shtypi amerikan e quan “eko-fashisti i shekullit XXI”.
Prifti gjithashtu i referohet një studimi të fundit të publikuar në British Medical Journal në qershor 2024, që analizon rritjen e vdekshmërisë pas fillimit të vaksinimit në prill 2021. “Këto të reja tregojnë se e vërteta po vjen në sipërfaqe dhe se njerëzimi po reagon,” shkruan ai.
Ai përfundon duke shprehur shqetësimin për shkencëtarët që kanë humbur jetën apo janë përndjekur për përpjekjet e tyre për të zbuluar të vërtetën dhe për të gjetur kura efektive për COVID-19. “Historia do të shënojë këtë ngjarje dhe do të evidentojë emrat e atyre që u përpoqën për të zbuluar të vërtetën dhe atyre që e krijuan dhe e ideuan virusin,” përfundon Prifti.
Kjo deklaratë ngre shumë pikëpyetje dhe kërkon verifikime të mëtejshme nga autoritetet për të konfirmuar saktësinë e akuzave të bëra nga mjeku Edvin Prifti.
