Ditën e sotme Këshilli i Ministrave miratoi vendimin “Për trajtimin me pagë e shtesa mbi pagë dhe për procedurën e kompensimit financiar gjatë qëndrimit në punë të punonjësve të policisë së burgjeve” i cili përcakton trajtimin me pagë shtesë mbi pagë dhe përfitojnë 3559 punonjës.
Lajmin e bëri të ditur ministrja e Drejtësisë, Etilda Gjionaj, e cila dha detaje mbi vendimin.
Vendimi garanton shtesë në pagë për natyrë të veçantë pune, shtesë për gradë, po ashtu edhe shtesa për çdo vit vjetërsi shërbimi, si dhe kompensimet e shpenzimeve të udhëtimit, kompensimi për qiranë e banesës ashtu edhe trajtimi me ushqim pa pagesë.
Sipas të dhënave të vendimit kjo rritje page do të eliminojë krejtësisht pabarazitë që qëndronin deri më sot, ndërsa theksohet më tej se edhe këtyre punonjësve do t’u kompensohen shpenzimet e bëra për transportin nga shtëpia në punë, në dukje 3 mijë deri në 15 mijë lekë, në varësi të distancës që përshkon.
Sipas vendimit, edhe kjo pikë nuk parashikohej deri më sot si benefite për punonjësit e policisë.
“Një nga garancitë kryesore të parashikuara në nismën ligjore të Ministrisë së Drejtësisë të miratuar si ligj nr. 80/2020 nga Kuvendi në qershor të vitit 2020 “Për Policinë e Burgjeve” është edhe krijimi i garancisë për barazimin e punonjësve të Policisë së Burgjeve me pagë dhe përfitime të tjera financiare shtesë me punonjësit e Policisë së Shtetit për shkak të natyrës së punës që ata kanë.
Në VKM përcaktohet e drejta e përfitimit të kompensimeve të shpenzimeve të udhëtimit në vlerë lekësh për muaj bazuar nga distanca në kilometra nga vendbanimi i punonjësit.
Ky kompensim fillon nga shuma 3.000 Lekë në muaj për distancën më të shkurtër prej mbi 36 km deri në 15.000 lekë në muaj për distancën më të gjatë 200 km kur punonjësi komandohet larg vendbanimit”, përcakton vendimi.
Kompensim qiraje dhe ushqimi
Gjithashtu çdo punonjësi polici do t’i paguhet qiraja e banesës, në ato raste kur ai transferohet jashtë vendbanimit të tij për arsye pune së bashku me familjen.
Sigurisht këtë kompensim ai përfiton nëse transferohet në një distance më shumë se 36 km. Gjithashtu në këtë VKM parashikohet edhe e drejta e kompensimit për ushqim në rastet kur është i pamundur trajtimi me ushqim nga institucioni përkatës, sigurisht në të njëjtat baza si kompensimi për policinë e shtetit.
“Në VKM e miratuar përcaktohet gjithashtu edhe drejta e përfitimit të kompensimit për qiranë e banesës kur punonjësi është transferuar apo komanduar larg vendbanimit.
Ky përfitim shtesë i njëjtë me punonjësit e policisë së shtetit dhe merret nga punonjësi i Policisë së Burgjeve që transferohet ose komandohet jashtë vendbanimit të tij të përhershëm për shkak të detyrës ose për nevoja pune. Këtë kompensim punonjësi e përfiton nëse transferohet ose komandohet në largësi mbi 36 km”, thuhet në vendim.
Afatet dhe efektet financiare nga përfitimet
1.
Nga zbatimi i pagës bazë për gradë për periudhën 07.08.2020 deri 30 nëntor 2020 shtesa është 42.3 milion lekë.
2.
Nga shtesa për vjetërsi shërbimi efektet financiare për vitin 2021 për pagën bazë për gradën, si dhe efektet për shtesën për vjetërsi shërbimi që hyn në fuqi me datën 01 janar 2021 llogariten rreth180milion lekë.
3.
Nga shtesa për natyrë të veçantë pune shtesë që do të fillojë zbatohet nga data 1 Janar 2022 efektet financiare llogariten rreth120 milion lekë. Ndërsa kostoja totale për pikat e lartpërmendura llogariten rreth 306 milion lekë.
4.
Efektet financiare për kompensim të transporti, për qiranë e banesës si dhe të trajtimit me ushqim llogariten rreth 20.8 milionë lekë në vit./GazetaReforma.com/
