Qeveria ka miratuar një ndihmë prej 10 mijë lekësh për 10 mijë të punësuarit dhe ish-të punësuarit në vitin 2020 në subjektet e transportit publik, ndërqytetas, qytetas dhe shërbimet taksi.
Drejtori i Shërbimit të Transportit Rrugor, Blendi Gonxhja ka bërë me dije se fondi është vënë në dispozicion nga institucioni që ai drejton, pra DPSHTRR.
“Ky është një tjetër akt solidar në prag të festave të fundvitit nga DPSHTRR – MIE për sektorin e transportit rrugor të udhëtarëve. DPSHTRR vuri në dispozicion të Qeverisë Shqiptare fondin vjetor të bonusit nga realizimi i bilancit të 2019-ës si ent, duke e hequr nga vetja për t’ua shpërndarë 10 mijë individëve në prag të vitit të ri. Akti i tretë sivjet nga DPSHTRR ”, theksoi Gonxhja.
Sipas drejtorit të DPSHTRR-së, ndihma solidare e miratuar me vendim të Këshillit të Ministrave është në vlerën e 10 mijë lekëve.
Kjo ndihmë bëri të ditur Gonxhja, do kalojë direkt në numrat e llogarive bankare sipas listës dhe brenda dhjetorit 2020./Gazetareforma.com/
