Kuvendi i Shqipërisë ka miratuar me 97 vota pro, projekt-rezolutën për ngritje e Gjykatës Kushtetuese.
Qëllimi i kësaj rezolute, është ndalimi i emërimit të Marsida Xhaferllarit, si anëtare e kësaj gjykate.
Për Kuvendin, dekretimi i Xhaferllarit është bërë jashtë afateve të përcaktuara në Kushtetutë.
Edhe opozita e re parlamentare ka bashkuar votat me maxhorancën.
Ngërçi me Kushtetuesen është komentuar edhe nga zv.kryeministri Erion Braçe, në fund të seancës.
Braçe ka mbrojtur Arta Vorpsin, duke thënë se Kushtetuta e përcakton qartë, që nuk mund të zgjidhet përtej tre emrave të parë të listuar nga KED.
“Kam përshtypjen që ju mediat i jeni referuar kryetares së dhomës së noterëve e cila i është referuar një procesi ligjor. Noteria funksionon mbi bazë të një ligji dhe në asnjë rast nuk është parukeri. Kushtetuta ka thënë që i katërti nuk bëhet dot i dytë, ndaj kur flasim për Kushtetutë i referohemi në tërësi”- u shpreh Braçe.
Rezoluta e Kuvendit për presidentit Ilir Meta titullohej: “ Shmangia e krizës kushtetuese me synim legjitimitetin e gjykatës kushtetuese – detyrë imperative e organeve më të larta të shtetit”.
