Kuvendi miratoi ditën e djeshme në seancën e fundit plenare për këtë sesion parlamentar, projektligjin për legalizimin e kanabisit për qëllime industriale. Në një dalje për mediat kreu i Partisë së Lirisë, Ilir Meta u shpreh se ky akt i turpshëm u bë pas mesnate në errësirë. Sipas Metës, Rama me vetëdije të plotë mbajti premtimin që iu bëri narkotrafikantëve për shërbimet që iu bë në zgjedhjet e fundit. Kujtojmë se 3 deputetë socialist abstenuan.
“Dua të denoncoj aktet e turpshme të maxhorancës dje në Kuvend, ku ajo mbylli sesionin për veten e saj dhe gjithçka që i takon kapjes së shtetit. Dje pas mesnate në errësirë, Kuvendi miratoi ligjin për legalizimin e kanabisit, një ligj i kritikuar nga të gjithë dhe i paralajmëruar se do të dëmtojë të ardhmen e vendit. Ky ligj ka dështuar dhe në vende me shtet të se drejtës më funksional se sa Shqipëria. Është e qartë se të gjitha raportet ndërkombëtare e nxijnë vendin tonë si një vend që është shndërruar në një qendër të rëndësishme të trafikut të drogës, të kokainës, heroinës dhe kanabisit. Duam të theksojmë se Rama me vetëdije të plotë mbajti premtimin që iu bëri narkotrafikantëve për shërbimet që iu bë në zgjedhjet e fundit.”, tha Meta.
