Sulmuesi i Kombëtares Shqiptare të Futbollit, Taulant Seferi ka folur në një konferencë për mediat në prag të miqësores së të premtes ndaj Azerbajxhanit ku ndër të tjera u shpreh se është peshë e rëndë dhe përgjegjësi mbajtja e fanellës së Kombëtares. Ndërsa shton se Europianin nuk e sheh si trampolinë.
Taulant Seferi: Europianin nuk e shoh për kontratë, mendoj për kombin shqiptar. Ne jemi për kombëtaren. Anën e transferimit nuk e mendoj, vetëm pasi të mbarojmë me kombëtaren. Jemi shqiptarë dhe jemi shumë krenarë për fanellën që veshim. Është një fanellë shumë e rëndë, ne japim maksimumin për këtë fanellë. Shpresoj të marrim rezultate.
Sa i përket ndeshjeve në Euro 2024 dhe grupit të “zjarrit” ku ndodhet Shqipëria, Seferi tha se në çdo ndeshje duhet të jepet maksimumi. Ai tha se për momentin sytë dhe e gjithë vëmendja e ekipit është tek ndeshja me Italinë.
Taulant Seferi: Ne jemi sulmues dhe duhet të shënojmë, po punojmë fort dhe jemi të gjithë mirë. Do të përgatitemi në maksimum për çdo ndeshje. Ndeshja nga ndeshja dallon, janë kundërshtarë të fortë. E gjitha që duhet të bëjmë është të japim maksimumin, e kemi mendjen te Italia. Duhet të kemi shpirtin luftarak dhe të jemi të bashkuar, si një grup i vetëm. Nëse arrijmë këtë do t’ia dalim mire.
