Ministrja e Arsimit Rinisë dhe Sporteve, Evis Kushi ka zhvilluar ditën e sotme një takim me mësues në kryeqytet ku është diskutuar në lidhje me risinë që të sjellin në shkollat në sezonin e ri 2021-2022, ku që në klasë të parë do të nisë të mësohet gjuha angleze. Kushi në një postim në rrjetet sociale shkruan se mësimi i kësaj gjuhe që në moshë të re, është një domosdoshmëri.
“Mësimi i gjuhës angleze që në moshë të hershme tek nxënësit tashmë është një domosdoshmëri, prandaj do të nisë të mësohet në të gjitha shkollat e vendit që nga klasa e parë e vitit shkollor 2021-2022.
Në këtë kuadër, zhvillova një takim me mësues të shkollave të ndryshme të kryeqytetit ku bashkëbiseduam nga afër rreth përgatitjeve dhe masave të marra për zbatimin me sukses të kësaj politike të re”, shkruan ministrja e Arsimit Rinisë dhe Sporteve, Evis Kushi.
Kujtojmë se disa ditë më parë ministrja e Arsimit Rinisë dhe Sporteve, Evis Kushi gjatë një konference për mediat ka folur lidhur me vitin e ri shkollor. Kushi ka lajmëruar se viti i ri shkollor 2021-2022 do të fillojë dy javë përpara datës zyrtare, me qëllim plotësimin e mangësive të programit shkollor. “Ne kemi vendosur që për vitin e ardhshëm 2021-2022, dy javë përpara datës zyrtare të fillimit të vitit shkollor, ne do të kemi mësimin plotësues në të gjitha shkollat tona. ”tha ministrja .
