Pasi i kërkuan interpelancë ministres së Drejtësisë, Etilda Gjonaj, 7 deputetë të opozitës së re kërkojnë sqarim nga minisitri i Brendshëm, Sandër Lleshaj.
Deputetët që kanë firmosur janë: Lefter Maliqi, Artur Roshi, Besnik Troplini, Ramazan Gjuzi, Fatjona Dhimitri, Halil Jakimi dhe Kostaq Papa, ndërsa kërkesa është depozituar në Kuvend.
Ata e gjykojnë si të rëndë gjendjen kriminale në vendin tonë dhe duan që Lleshaj t’i informojnë me punën e dobët të policisë për parandalimin e krimit.
“Kërkohet një informacion për punën e dobët të policisë për zbulimin dhe parandalimin e krimeve. Marrëdhëniet polici-publik dhe sa ndikon depolitizimi i policisë në rastet e shkeljeve të ligjit. Aktualisht kemi një situatë të rëndë kriminale ku janë evidentuar raste të shumta, vrasje, rrëmbime, grabitje, kërcënimi, tritole, etj, në Vlorë, Shkodër, Elbasan, Tiranë, Lushnje, etj. Kërkohet informacionet për punën e policisë në këto raste”, thuhet në kërkesën e deputetëve për interpelancë me ministrin Lleshaj.
Po ashtu, në kërkesën për interpelancë përmenden edhe veprimet e policisë në disa protesta të ndodhura së fundmi në kryeqytet, si: protesta te Bregu i Lanës dhe protesta në Astir.
“Tejkalimi i kompetencave të policisë dhe përdorimi i gazit lotsjellës ndaj banorëve të zonave të ashtuquajtura “Bregu i Lumit” të Astirit, etj kundër familjarëve dhe pleqve, fëmijëve, grave. Në cilin ligj është mbështetur policia për të përdorur forcën dhe këto mjete dhe çfarë urdhri është dhënë në këto raste“, kërkojnë sqarime deputetët e opozitës së re.
Në dokumentin e depozituar në Kuvend kërkohet nga ministri që të sqarojë edhe çështje të tilla, si:
-akuzat e policisë ndaj gjykatës
-aksidentet e shumta
-masat e marra ndaj kultivuesve të drogës
-roli i policisë kufitare
Bëhet e ditur se interpelanca do drejtohet nga deputeti Lefter Maliqi, ndërsa shkresa mbyllet duke kërkuar nga ministri i Brendshëm edhe sqarimet e tij për procesin e vettingut në polici dhe “çështje të tjera që kanë të bëjnë me rendin, sigurinë në vend”.
Kujtojmë se Lleshaj në një dalje publike mbrëmjen e djeshme u shpreh se policia po bën një punë të shkëlqyer dhe se niveli i vrasjeve në vendin tonë është shumë më i ulët se në shumë vende të zhvilluara.(Lexo këtu)
