Dhjetëra qytetarë janë mbledhur këtë të hënë përpara Ministrisë së Shëndetësisë dhe Mbrojtjes Sociale për të protestuar pas skandalit që shpërtheu në Spitalin e Onkologjisë, në Qendrën Spitalore Universitare “Nënë Tereza”. Me pankarta në duar, të cilat mbanin mesazhe për ngjarjen ata kërkuan drejtësi dhe dënimin e mjekëve të përfshirë. Ashtu si dhe në herën e kaluar ata vendosën një pankartë në derën e ministrisë ku shkruhej: “Ministria e Vdekjes”.
Mjekët e punonjësit e spitalit “Onkologjik” kishin ngritur një skemë mashtrimi e abuzimi, ku për të fituar shuma të majme monetare, linin pa shërbim pacientët me sëmundje tumorale, në mënyrë që ata të drejtoheshin tek klinika private. Pjesë e kësaj skeme ishin: Edmond Gashi, mjek pranë Spitalit Onkologjik, Emiljano Lela, koordinator pranë Spitalit Onkologjik, Alketa Ymeri (Pere), Mjeke pranë Spitalit Onkologjik, Brikena Qirjazi zëvendësdrejtoreshë në Qendrën Spitalore Universitare Nënë Tereza, në bashkëpunim me pronarin e klinikës private “Megis”, që është në administrim të Halil Gashit, Florian Marku, administratori i farmacisë ‘Flori Farma’ dhe Drilona Kishta.
