Eugena Tomini emërohet zëvendës ministre e Shëndetësisë. Vendimi është marrë ditën e sotme dhe pritet të zyrtarizohet në ditët në vijim.
Eugena Tomini bëhet kështu zëvendësministrja e katërt e Ministrisë së Shëndetësisë dhe Mbrojtjes Sociale, bashkë me Mira Rakacolli, Albert Nikolla dhe Bardhylka Kospiri.
Më herët ajo ka qenë shefe departamenti në Institutin e Shëndetit Publik, më konkretisht, Shefe e Survejancës dhe Shërbimit të Inteligjencës Epidemike në ISHP.
Pse u emërua Eugena Tomini?
Tomini ka qenë shumë aktive në muajt e fundit me daljet e saj publike sa i takon trajtimit të pandemisë së Covid 19 në vendin tonë. Ajo ka mbrojtur politikat e qeverisë, si mbylljen e pjesshme, lënien hapur të shkollave dhe kopshteve, që “spitalet Covid kanë shumë shtretër dhe mjaftojnë”, etj. Qeverisë i duhen njerëz të tillë, që të mbrojnë publikisht arritjet në shëndetësi. Nga ana tjetër, vihet re se personat e tjerë në ministri, si Rakacolli janë konsumuar dhe duhet të rifreskohet ekrani me fytyra të reja.
Tomini tha para disa ditësh se është vënë re një tendencë në rritje të rasteve me COVID.
Duke komentuar rekomandimin për të alternuar mësimin në arsimin para universitar me mësim online, është shprehur se vlerësimi i specialistëve ka nxjerrë në fokus se për këtë grup moshë ka përhapje të ulët të COVID-19.
Znj. Tomini theksoi se, është rekomanduar mësim në distancë i alternuar me mësim në klasa, në varësi dhe të zonave gjeografike ku përhapja e virusit ndryshon. Mjekja tha se, grup mosha që ka përhapjen më të madhe të COVID-19 është 20-35 vjeç.
“Për sistemin parashkollor është vërtetuar është shumë herë më i ulët pozitiviteti. Është gjykuar sipas skenarëve të Ministrisë së Arsimit që të alternohet mësimi online me pjesëmarrjen fizike”, tha ajo.
Anëtarja e Komitetit Teknik të Ekspertëve nga ana tjetër bëri të ditur se nuk do të ketë asnjë kufizim për sistemin parashkollor pasi për këtë grup moshë ka transmetueshmëri të ulët duke thënë se nga 5 deri në 15 vjeç kemi një pozitivitet që varion deri në 2%.
Lidhur me tezën e hedhur nga Akademia e shkencave se tashmë gjysma e njerëzve e kanë kaluar Covid-19 dhe kanë krijuar imunitet, Tomini është treguar e rezervuar.
“Imuniteti i tufës do të ishte kënaqësi për të gjithë, do ishte arritje. Pandemia po vijon me valë të saj, me një intensitet ku transmetueshmëria është e lartë. Jemi larg imunitetit të tufës, pavarësisht transmetueshmërisë së lartë”, -ka deklaruar Tomini për mediat. /Gazetareforma.com/
