Ministria e Mbrojtjes u ka dërguar një letër për të marrë masa parandaluese 12 prefektëve, për situatën që mund të krijohet nga reshjet dhe ngricat nga data 3 janar dhe në vazhdim.
Jo vetëm prefektëve por edhe drejtuesve të bashkive dhe të institucioneve qendrore në nivel rajonal dhe vendor, u ka kërkuar të marrin masa urgjente dhe të sigurojnë kushtet për një jetë normale të komunitetit.
Ministria e Mbrojtjes përmes Drejtorisë së Përgjithshme të Emergjencave Civile u ka kërkuar prefektëve të komunikojnë me subjektet kontraktore që të venë në dispozicion të gjitha kapacitetet e tyre njerëzore dhe teknike, të sigurojnë kripën për të ndërhyrë në pastrimin e rrugëve nga dëbora, pastrimin e rrugëve nga gurët dhe eliminimin e ngricave në rrugë.
Ministria e Mbrojtjes u ka kërkuar prefektëve të bashkëpunojnë me strukturat e Policisë së Shtetit, ARRSH, OSHEE, për të pasur një menaxhim dhe qarkullim normal të automjeteve në akset rrugore, veçanërisht të atyre që kryejnë transportin e nxënësve dhe mësuesve për në shkolla dhe anasjelltas, si dhe të punohet për eliminimin në kohë të defekteve në furnizimin me energji elektrike të komunitetit, objekteve social-kulturore, spitaleve, etj, për të përballuar sa më mirë situatën që mund të krijohet nga reshjet, ngricat, etj.
Ministria e Mbrojtjes dhe Forcat e Armatosura kanë marrë masat dhe janë në gatishmëri për të përballuar situatën e vështirë që pritet të krijohet nga reshjet e borës dhe ngricat që pritet të përfshijnë vendin tonë në ditët në vijim. Strukturat e mbështetjes rajonale të Forcave të Armatosura, me mjete dhe efektivë mbeten të gatshëm të ndërhyjnë aty ku do të ketë probleme, ndërkohë që në gatishmëri janë edhe pilotët dhe helikopterët në Bazën Ajrore të Farkës. Qendra Kombëtare Operacionale e Emergjencave Civile pranë Drejtorisë së Përgjithshme të Emergjencave Civile në Ministrinë e Mbrojtjes, është 24 orë në gatishmëri, në ndihmë të përballimit të situatave emergjente.
