Gjatë 24 orëve të fundit janë regjistruar 32 vatra zjarri në disa bashki të vendit, nga të cilat 9 mbeten ende aktive.
Zjarret janë përhapur kryesisht në zona me bimësi të dendur, pyje me pisha, ah, dushqe dhe shkurre, duke shkaktuar dëme të konsiderueshme në sipërfaqe pyjore dhe duke rrezikuar banesa, stanet e verimit dhe koshere bletësh.
Vatrat aktive ndodhen kryesisht në këto zona:
• Dibër: Në Parkun Kombëtar të Lurës, pranë “Liqenit të Luleve”, janë dy vatra aktive – një në “Fusha e Pelave” dhe tjetra mbi fshatin Gurë-Lurë, e cila është nën monitorim. Po ashtu, një vatër tjetër është riaktivizuar në Dovolan (Maqellarë), duke avancuar drejt zonës së Pejkës dhe pranë Drinit të Zi.
• Bulqizë: Në njësinë Zerqan, mbi fshatin Krajkë, është aktive një vatër zjarri në terren të thyer, me shkurre dhe dushqe.
• Mat: Në zonën e mbrojtur të Zall Gjoçajt, në “Përruan e Zi”, zjarri po përhapet në një sipërfaqe me pisha dhe ah, ndërhyrja është e vështirë për shkak të relievit.
• Mallakastër: Në fshatin Belishovë, një vatër aktive po avancon nga Drenova.
• Vlorë: Në “Qafën e Shëngjergjit”, mbi zonën e Dukatit (Orikum), është riaktivizuar një vatër në majën e Paliskës, ku po punojnë forcat vendore, Forcat e Armatosura dhe një helikopter.
• Tepelenë: Në afërsi të Beçishtit, zjarri po mbahet nën kontroll pranë antenave celulare.
• Kurbin: Në zonën e Shkopetit (Milot), zjarri vijon të jetë aktiv dhe ka përfshirë rreth 65 hektarë pyje.
• Elbasan/Librazhd: Në kufirin mes fshatrave Shmil dhe Gurakuq, një zjarr i përmasave të mëdha ka përfshirë një pyll gështenje.
Deri më tani, janë djegur mbi 90 hektarë sipërfaqe me pyje dhe bimësi. Në terren janë angazhuar 44 automjete zjarrfikëse dhe 620 forca operacionale, ndërsa Forcat e Armatosura kanë vënë në dispozicion 110 efektivë, 5 mjete zjarrfikëse dhe 2 helikopterë. Vetëm gjatë ditës së sotme janë përfshirë 167 ushtarakë, 21 automjete me ekuipazh dhe një helikopter për ndërhyrje nga ajri.
Sipas IGJEUM, sot nuk parashikohen reshje, ndërsa niveli i rrezikut për zjarre në pyje është “I LARTË” në qarqet Lezhë, Tiranë, Elbasan, Fier, Berat, Korçë dhe Gjirokastër. Qarqet e tjera përballen me rrezik të moderuar.
Autoritetet vijojnë të jenë në gatishmëri të plotë dhe u bëjnë apel qytetarëve që të tregojnë kujdes maksimal dhe të njoftojnë menjëherë strukturat përkatëse në rast se konstatojnë zjarr apo tym në zonat pyjore apo rurale.
