Ministria e Mbrojtjes ka publikuar bilancin e situatës së zjarreve në vend për 24 orët e fundit, duke raportuar për 19 vatra të evidentuara, nga të cilat tre mbeten ende aktive dhe po trajtohen me përparësi nga forcat operacionale.
Sipas të dhënave zyrtare, në terren janë angazhuar gjithsej 445 forca operacionale, të mbështetura nga 48 automjete zjarrfikëse, 9 mjete të rënda, si dhe 73 ushtarakë të Forcave të Armatosura.
Gjithashtu, është përdorur edhe ndihma nga ajri, përfshirë dy avionë suedezë të vënë në dispozicion nga Mekanizmi Evropian i Mbrojtjes Civile.
Vatrat më problematike aktualisht janë:
• Dhivër, Bashkia Finiq – Një vatër e përhapur në zonë pyjore malore, ku janë dislokuar 10 mjete zjarrfikëse nga bashkitë e jugut dhe rreth 120 forca nga strukturat vendore, FA dhe ndërhyrje ajrore.
• Lofkënd, Bashkia Mallakastër – Flakët kanë përfshirë një sipërfaqe me pisha. Në terren po punojnë 130 forca operacionale dhe 11 mjete zjarrfikëse, mes tyre edhe të Forcave të Armatosura, të ndihmuara nga ajri.
• Vjollcë, Bashkia Mirditë – Një vatër në pyll pishe dhe shkurre ka mbetur e pakontrolluar pavarësisht ndërhyrjeve të shërbimeve zjarrfikëse, pyjore dhe vullnetarëve lokalë. Deri më tani nuk raportohet rrezik për banesat.
Ministria ka përsëritur thirrjen për kujdes maksimal nga banorët dhe apelon për raportimin e çdo vatre të re për të parandaluar përhapjen. Agjencia Kombëtare e Mbrojtjes Civile mbetet në gatishmëri të plotë për koordinimin dhe ndërhyrjet e mëtejshme.
