Turizmi është padyshim një nga sektorët më të prekur nga pandemia, teksa sa më shumë afron sezoni turistik, aq më tepër ndihen pasojat.
Qeveria ka vendosur të hapë plazhet në datë 1 qershor për hotelet dhe në 15 qershor plazhet publike por operatorët turistikë janë në kaos për shkak të vendimmarrjes së paqartë, teksa ende nuk ka një plan konkret se si do veprohet.
Ditët e fundit është vënë në qendër të kritikave fakti se Policia nuk lejon njerëzit të futen në plazh, ndonëse restorantet dhe hotelet janë hapur.
Mbrëmjen e sotme ministri i Turizmit dhe Mjedisit Blendi Klosi ka qenë i ftuar në ‘Open’ ku ka folur rreth kësaj problematike, duke u shprehur se qytetarët nuk lejohen të futen në det sepse përbëjnë rrezik infektimi për shkak të grumbullimeve.
“Këtë pyetje keni 2 muaj që ma bëni. Në fillim më keni pyetur pse nuk lejohet të dalin njerëzit të dalin nga liqeni. Tani ne nuk lejojmë plazhet se aty do ketë një grumbullim të njerëzve duke rrezikuar përhapjen e virusit. Nuk është e thënë se doli dielli dhe virusi u largua. Jo, virusi është aty, nuk ka ikur”, u shpreh ai.
Megjithatë, deklarata e tij ngre pikëpyetje sepse njerëzit nuk grumbullohen vetëm në det, por mund të grumbullohen edhe në kafe apo hotele, që tashmë janë hapur.
Sakaq, nëse vijojmë me këtë logjikë a mbetet ky rrezik edhe pas datës 1 qershor, kur do hapen plazhet?
Më tej, Klosi u shpreh se është shumë i vetëdijshëm se sektori i turizmit është dëmtuar shumë nga pandemia, megjithatë nuk mendon se hapja e tij mund të ndryshonte gjë.
Këtu ne sjellim në vëmendje se operatorët turistik kanë kërkuar hapjen sa më parë të sezonit dhe përgatitjen e një protokoli, pasi do të kenë vështirësi në përgatitjen e tyre.
Turizmi ka pësuar një dëmtim të madh nga pandemia. Por, turistët vijnë pas qershorit. Të bëhet ky debat i madh për një situate në plazhe që bëhet për të mirën e qytetarëve është e pakuptimtë. Le të themi se sa i përket të dielës që e bllokuar duhet të themi se ky ka qenë rregulli. Idelaja do ishte mos të kishte njerëz jo policë.
Më tej, ministri tha se nëse më parë njerëzit kishin mundësinë të shkonin në plazh vetëm për të fjetur (referuar hapjes së hoteleve), tashmë mund të shkojnë edhe për të ngrënë (referuar hapjes së restoranteve).
Ndërsa mbyllja e fundjavave sipas tij ka kuptim vetëm sepse është rregull.
Mirëpo, sipas operatorëve turistik, bllokimi i fundjavave nuk ka kuptim sepse kufizimi i lëvizjes dhe mungesa e transportit pubik janë një problematikë më vete për sektorin e turizmit.
Deri tani nuk ka ende një protokoll se çfarë do ndodhë me plazhet dhe me sezonin turistik, teksa çdo vonesë i kushton shumë turizmit.
