Ministri i Shtetit të Greqisë, Stavros Papastavrou, ka zhvilluar një takim me kryebashkiakun e zgjedhur të Himarës, Fredi Beleri, i cili aktualisht ndodhet në burg. Takimi ka ndodhur në burgun e Durrësit, ku Beleri qëndron prej muajsh, para një gjyqi të planifikuar për ditën e nesërme. Papastavrou ka shfaqur mbështetje ndaj Belerit gjatë takimit.
Fredi Beleri u arrestua dy ditë para zgjedhjeve vendore të 14 majit, me akuzat e prokurorisë se ka ofruar para në këmbim të votave. Ai ka mohuar akuzat dhe ka theksuar se është një akt me sfond politik. Kërkesat e tij për ndryshimin e masës së sigurisë janë refuzuar, ndërsa ai ka vazhduar të mbrohet nga akuzat.
Arrestimi i Belerit ka tensionuar marrëdhëniet mes Tiranës dhe Athinës. Greqia ka kërkuar lirimin e tij, duke pretenduar shkeljen e të drejtave të njeriut dhe të pakicave, dhe ka bërë kërcënime për bllokimin e rrugëtimit të Shqipërisë drejt anëtarësimit në Bashkimin Europian.
