Ministri i Brendshëm, Taulant Balla, ka ftuar maturantët që kanë ambicie të bëhen pjesë e Policisë së Shtetit të aplikojnë në Akademinë e Sigurisë. Në një deklaratë të bërë sot, Balla vlerësoi rëndësinë e këtij institucioni arsimor për të rinjtë që duan të ndjekin një karrierë në fushën e sigurisë dhe hetimit.
“Ndërsa vlerësoni drejtimin që doni të marrë jeta juaj, të merrni në shqyrtim edhe propozimin tonë që studimet ‘Bachelor’, pas përfundimit të arsimit të mesëm, t’i kryeni tek një institucion i certifikuar arsimor, si Akademia e Sigurisë. Në 3 vite studim në fakultetin e Sigurisë dhe Hetimit, ju do të merrni jo vetëm diplomën ‘Bachelor’, por edhe një gradë policore, ‘Nënkomisar’. Kjo do t’ju çelë një mundësi të re në jetën tuaj, jo vetëm për t’u bërë pjesë e organizatës së Policisë së Shtetit. Por sapo të mbarosh studimet në bankat e universitetit, ta kesh vendin e punës të siguruar, këtë ta ofron vetëm Akademia e Sigurisë. Këtu, që nga dita e parë e pranimit, hyn një sistem kontrate, pagese dhe vendi të sigurt pune,” deklaroi Balla.
Ministria e Arsimit ka mundësuar aksesin në portalin UAlbania nga data 30 korrik deri më 4 gusht për të gjithë të rinjtë që duan të aplikojnë.
“Kemi 100 kuota në këtë vit të parë. Dua t’ju garantoj se Akademia e Sigurisë është një institucion që ka brenda vetes profesorë shumë të mirë me një përvojë të shkëlqyer. Por ne do të kemi pjesë të Akademisë edhe profesorë që vijnë nga akademi policie nga vende të ndryshme, SHBA, UK, Gjermania, Spanja, Italia pa tjetër dhe vende të tjera që kanë një traditë shumë të pasur. Unë e nxis Drejtorin e Akademisë që të kemi sa më shumë partneritete në funksion të shndërrimit të AS së Tiranës, në një qendër të rëndësishme universitare me profilin e sigurisë, jo vetëm për Shqipërinë, por për gjithë Ballkanin perëndimor,” përfundoi ministri.
