Pas një hetimi 6-mujor, policia finalizoi 5 ditë më parë operacionin e ashtuquajtur “Mezhgorani” , në kuadër të të cilit u arrestuan, u ndaluan dhe u proceduan dhjetra shtetas.
Policia sekuestroi gjatë operacionit 3 pushkë automatike me silenciator, 2 kallashnikov, 10 kallëpe tritol, 620 fishekë, 2 granata difensive, 71 krehër fishekësh, 20 automjete te markave të ndryshme, 40 telefona celular, dokumente noteriale, kontrata, certifikata pronësie të ndryshme, rreth 130 kg kanabis, shuma prej 10 milion lekësh, 7500 euro, si dhe 3500 euro të dyshuara të falsifikuara.
Ditën e sotme, Policia e Shtetit ka vënë në pranga një tjetër person të shpallur në kërkim për operacionin e shtrirë në disa qytete.
Bëhet fjalë për 32-vjeçarin Brahim Mara, banues në Mallakastër, për të cilin Gjykata ka vendosur masën e sigurisë “Arrest në burg”, për veprat penale “organizimi i lojërave të palejuara” dhe “moskallëzim krimi”.
Kujtojmë se dy ditë më parë në një seancë maratonë që zgjati më shumë se nëntë orë, gjyqtari Dritan Hasani la në masën “detyrim paraqitje”, pronarin e Universiteti Europian të Tiranës Henri Çilin dhe dhjetë persona të tjerë, mes tyre noterja Shpresa Gjoçaj dhe dy vajzat, Kristina Bashi dhe Kejsi Meço.
Ndërsa 16 persona janë lënë në burg me vendim të Hasanit, mes tyre është Amarildo Aliko, kushëriri i Alban dhe Arbjon Alikos, të dënuarve për vrasjen e efektivit Ibrahim Basha.
Mezhgorani/ Jepen vendimet për të akuzuarit, mësohet kush qëndron në burg
