Ditën e djeshme presidenti Ilir Meta dekretoi datën e re të zgjedhjeve. Ai vendosi datën 13 tetor për të votuar shqiptarët.
E ndërsa sot, nëpërmjet një postimi në rrjetet sociale, Meta u ka bërë thirrje njerëzve që të respektojnë bashkëqytetarët që do të shkojnë të votojnë në 30 qershor, në ato që ai i quan “zgjedhje socialiste”.
“Nga dje, data kushtetuese e zgjedhjeve vendore është 13 tetor 2019. Situata është e qartë dhe e padiskutueshme nga ana ligjore dhe kushtetuese. Gjithsesi kryeministri po insiston për të shkuar në votime socialiste në datën 30 qershor 2019. Ju këshilloj ta merrni atë me qetësi e mençuri, dhe të mos bini pre e provokimeve, sepse ato u shërbejnë vetëm atyre që duan të legjitimojnë kapjen totale të shtetit dhe instalimin e një regjimi njëpartiak”, shkruan Meta.
Ditën e djeshme, presidenti Meta u ironizua nga kryeministri Rama dhe Elisa Spiropali për datën e re të zgjedhjeve, për të cilën nuk u erdhi aspak mirë.
“T’i respektojmë dhe të mos konfrontohemi me të gjithë ata bashkëqytetarë që do të shkojnë në këto votime socialiste. Konfrontimi dhe dhuna nuk i shërben Shqipërisë dhe së ardhmes së saj europiane, dhe sidomos bashkëjetesës sonë qytetare në çdo familje, në çdo lagje, në çdo fshat, në çdo komunitet dhe në të gjithë shoqërinë tonë.
Mos u nervozoni nga provokimet që do t’ju bëhen për t’ju çuar drejt dhunës. Ndoshta e teproj, por për t’i shijuar tamam votimet socialiste dhe për t’ju rikthyer qoftë dhe për 1 ditë asaj periudhë 45-vjeçare, shoqërojini me dajre e daulle si njëherë e një kohë.
Ata vetë do votojnë, vetë do t’i numërojnë. Të gjithë shqiptarët së bashku, në mënyrë demokratike, të fshehtë, të lirë dhe të ndershme do të zgjedhin vetëm në 13 tetor 2019”, e mbyll kështu presidenti Meta fjalën e tij.
