Presidenti i Shqipërisë, Ilir Meta, ka takuar Alex Soros.
Tedi Blushi, Zëdhënësi i Presidentit, bëri me dije lajmin nëpërmjet një statusi në Facebook.
Në takim ka qenë edhe Andi Dobrushi, Drejtor Ekzekutiv i Zyrës së Fondacionit në Shqipëri.
Sipas Blushit Meta i njohu me shqetësimet për ngërçin e Gjykatës Kushtetuese, për paketën “Anti-Shpifje”, si dhe për domosdoshmërinë e gjallërimit të shoqërisë civile në mbrojtje të vlerave demokratike dhe të drejtave të njeriut.
Statusi i plotë
Presidenti i Republikës Sh.T.Z Ilir Meta priti në një takim me kërkesë të tyre Zëvendëspresidentin e Fondacionit “Shoqëria e Hapur”, z.Aleksandër Soros dhe Drejtorin Ekzekutiv të zyrës së Fondacionit në Shqipëri, z.Andi Dobrushi.
Presidenti Meta i njohu me shqetësimet e Tij, të bëra edhe publike, për përpjekjet e qeverisë për kapjen e institucioneve të drejtësisë, e sidomos të Gjykatës Kushtetuese, për përkeqësimin e lirisë së medias, si dhe për domosdoshmërinë e gjallërimit të shoqërisë civile në mbrojtje të vlerave demokratike dhe të drejtave të njeriut.
Një muaj më parë Meta ftoi në një takim një përfaqësues të Fondacionit të Shoqërisë së Hapur, SOROS.
Alex Soros është i biri i miliarderit amerikan George Sorosit.
Alex është Zëvendëspresident i Fondacionit “Shoqëri e Hapur” dhe një nga drejtuesit e rinj të Forumit Ekonomik Botëror.
