Presidenti Ilir Meta ka reaguar për aksidentin e rëndë që ndodhi pasditen e sotme në Qafën e Muzinës. Meta ka shprehur ngushëllimet dhe solidaritetin e tij me familjarët e viktimave.
Presidenti u bën apel qytetarëve që të udhëtojnë me shumë kujdes në mënyrë që tragjedi të tilla të shmangen në të ardhmen. Meta i ka bërë gjithashtu thirrje Policisë Rrugore dhe strukturave përgjegjëse, që të marrin masa për parandalimin e aksidenteve kaq të rënda.
Reagimi i plotë:
Thellësisht i pikëlluar për jetët e humbura në aksidentin tragjik në Qafë-Muzinë.
Ndaj dhembjen e thellë dhe ju shpreh ngushëllimet më të ndjera dhe të gjithë solidaritetin familjarëve të tyre!
Të lënduarve ju uroj shërim sa më të shpejtë dhe i përgëzoj autoritetet shëndetësore për kujdesin dhe ndihmën që po u japin në këto momente të vështira!
Një apel të fortë u bëj të gjithë qytetarëve për të udhëtuar me shumë kujdes dhe dëshmuar përgjegjshmëri të lartë në drejtimin e automjeteve, në mënyrë që të tilla tragjedi tronditëse të shmangen në të ardhmen.
E nxis Policinë Rrugore dhe çdo strukturë tjetër përgjegjëse, që në këtë periudhë të ngarkuar të sezonit turistik, të marrin çdo masë efektive për parandalimin e aksidenteve kaq të rënda, që fatkeqësisht po bëhen kaq të shpeshta në rrugët e Shqipërisë.
