Presidenti i Shqipërisë, Ilir Meta ka reaguar pas faljes publike që i kërkoi kryetarja e LSI-së, Monika Kryemadhi. Meta ndër të tjera ka premtuar se sapo të mbarojë mandatin e tij si President do të rikthehet në LSI. Zëdhënësi i Presidentit, Tedi Blushi thotë se Meta e vlerëson fushatën e LSI-së me 110 mijë votuesve të saj. Po ashtu ai vë në pah se Meta është i keqardhur për tjetërsimin e votave të 25 prillit, por sipas tij kjo ishte e pritshme. Ndërkohë që menjëherë pas përfundimit të fjalës së Kryemadhit, Lëvizja Socialiste për integrim kërkon nga KQZ pamjet filmike të Qendrave të Votimit në të gjithë vendin.
Statusi nga Tedi Blushi
Presidenti i Republikës, Sh.T.Z Ilir Meta falenderon Kryetaren e LSI, znj.Monika Kryemadhi për reflektimin e saj lidhur me lënien e mandateve dhe bojkotin e zgjedhjeve vendore, që e mbifuqizuan pushtetin e Kryeministrit dhe i lehtësuan bërjen e shumë ligjeve korruptive me porosi dhe në interes vetëm të oligarkëve dhe blerjes së zgjedhjeve.
Presidenti Meta vlerëson fushatën e ndershme dhe model të LSI dhe sidomos rreth 110 mijë qytetarët, të cilët i rezistuan presionit të mafies, bandave, diskriminimit mediatik, survejimit dhe presioneve policore. Presidenti Meta shpreh keqardhjen për tjetërsimin masiv të votave, por kjo ishte e pritshme, për më tepër, që nuk u morrën masat e duhura për parandalimin e këtij krimi të rëndë zgjedhor.
Presidenti Meta në respekt të sakrificave për demokracinë, që ka bërë LSI, i njofton të gjithë anëtarët dhe simpatizantët e saj se më 24 korrik 2022 do të rikthehet për të marrë kartën e anëtarësisë së LSI dhe do t’u bashkohet përpjekjeve të të rinjve dhe të rejave për Shqipërinë e Shqiptarëve. 🇦🇱
