Presidenti i Partisë së Lirisë, Ilir Meta, është paraqitur sot në Prokurorinë e Posaçme Kundër Korrupsionit dhe Krimit të Organizuar (SPAK), vetëm një ditë pas paraqitjes së bashkëshortes së tij, Monika Kryemadhi. Meta ka kritikuar ashpër SPAK-un, duke e akuzuar për bashkëpunim me qeverinë e kryeministrit Edi Rama.
“SPAK është kthyer falë Dum Dumanit në një parti bashkëqeverisëse të Edi Ramës. Unë jam pyetur 3 orë kot më kot për gjëra që nuk kanë asnjë lidhje me mua, që kanë të bëjnë me veprime të të tjerëve, të miqve, shokëve dhe bashkëpunëtorëve të SPAK,” deklaroi Meta pas daljes nga prokuroria.
Meta pretendon se hetimi ndaj tij është i motivuar politikisht dhe ka për qëllim të diskreditojë opozitën. “Unë jam pyetur në cilësinë e kundërshtarit të këtij narkoshteti dhe këtij narkoregjimi që e mban në këmbë Dum Dumani, i cili në vend që të hetojë McGonigal të cilin e ka takuar ai dhe prokurorë të tjerë, në vend që të ndalojë Edi Ramën, inceneratorin, të ndalojë aferën e Portit të Durrësit dhe të gjitha ato PPP që janë rrjedhja më e madhe financiare e këtij vendi, merret me përrallat e laraskave të tij,” theksoi Meta.
Kjo paraqitje e Metës në SPAK dhe akuzat e tij ndaj prokurorisë vijnë në një kohë kur tensionet politike në vend janë të larta dhe akuzat për korrupsion dhe keqmenaxhim janë të shumta. Meta ka bërë thirrje për hetime të pavarura dhe të paanshme, duke e akuzuar qeverinë dhe prokurorinë për përpjekje për të heshtur opozitën.
