Presidenti i Republikës, Ilir Meta me anë të një postimi në rrjetet sociale ka dhënë një mesazh për Ditën Ndërkombëtare të Punëtorëve. Meta ka shkruar se edhe këtë vit Shqipëria ndodhet në nivelet më të ulëta të pagës në rajon dhe në Evropë, ndërkohë që fuqia punëtore e kualifikuar vazhdon të largohet nga vendi.
Ndër të tjera, Kreu i Shtetit ka shkruar se propaganda e të ushqyerit me lugë boshë dhe sukseseve ekonomike të paraqitura me video 3D, na rendisin sot të dytët pas Gjermanisë. Gjithashtu ai ka prekur edhe faktin që shumë mjekë po largohen drejt Gjermanisë dhe vendeve të tjera të Bashkimit Evropian për të pasur një jetesë më të mirë.
Postimi i Presidentit të Republikës, Ilir Meta
Dita Ndërkombëtare e Punëtorëve, edhe këtë vit, e gjen Shqipërinë me nivelin më të ulët të pagës në rajon dhe në Europë, ndërkohë që fuqia punëtore e kualifikuar vazhdon të largohet masivisht, në mungesë të të ardhurave të mjaftueshme, të kushteve më të mira e më dinjitoze të punës dhe pa shpresë për një të ardhme të afërt më të sigurt.
Tërmeti dhe pandemia, me efektet e tyre negative dhe afatgjafa në ekonomi, mbyllën me mijëra vende pune, kryesisht biznese të vogla e të mesme, duke e dëmtuar rëndë mirëqenien e familjeve të punëtorëve të thjeshtë, thelluar ndjeshëm mjerimin në shoqëri dhe frenuar zhvillimin e qëndrueshëm të vendit.
Propaganda e të ushqyerit me lugën bosh dhe e suksesit ekonomik me video 3D na rendit sot të dytëve pas Gjermanisë, por është fakt se shumë mjekë, infermierë dhe specialistë po zhvendosen në Gjermani dhe në vende të tjera të BE për një jetë më të mirë.
Ndërsa kjo situatë duhet të shërbejë për një reflektim të thellë dhe kur niveli i popullsisë që jetojnë me 5.5 USD/ditë është rritur me 41.5% është koha të veprojmë të gjithë së bashku për të dëgjuar zërin e punëtorëve, duke rritur mirëqenien dhe drejtësinë sociale të munguar. 🇦🇱
