Teksa ka folur në konferencën para gazetarëve, presidenti Ilir Meta ka shprehur gatishmërinë për të bërë testin mendor dhe se mban përgjegjësi për gjithçka që thotë.
Ai shtoi se pas kësaj krize, duhet vendosur në Kushtetutë bërja e testit të shëndetit mendor dhe atë të drogës.
Presidenti u shpreh:
“Jam i gatshëm të bëj testin e shëndetit mendor dhe mbas kësaj krize duhet të vëmë në Kushtetutë testin e shëndetit mendor si dhe të drogës. Për testin e shqiptarit, e dinë ata që e kam bërë e do ta bëj në çdo kohë”.
Presidenti foli për ato që ai i quajti zgjedhje socialiste duke thënë se e gjithë kjo ishte një komplot.
“I përqafoj të gjithë shqiptarët që shmangën një kurth dhe komplot të kurdisur prej kohësh për të ushqyer me çdo kusht përplasje civile. Nuk është një kurth i ri, është i hershëm.
Është një komplot i cili bazohet jo në parimet e demokracisë, as të vlerave të Bashkimit Europian e as të NATO-s, e cila siç tha Sekretari i Përgjithshëm, Stoltenberg, ka në parim demokracinë.
Por bazohet në parimet e “Deep State” që synon “total state capture”, “kapje totale të shtetit”. Synon krijimin e shtetit paralel dhe agjendave të nëndheshme, që janë në kundërshtim me parimet europiane”, tha Meta.
