Presidenti Ilir Meta ka emëruar anëtarin e 6-të të Gjykatës Kushtetuese Përparim Kalon. Duket se mes Aleksandër Tomës e Përparim Kalos, Presidenti ka zgjedhur këtë të fundit.
Kalo bëhet dhe anëtari i 6-të i Gjykatës Kushtetuese dhe zyrtarisht kjo Gjykatë është funksionale pasi ka përmbushur kushtin minimal të funksionimit apo kuorumin prej 6 anëtarësh. Në bazë të renditjes nga KED, Përparim Kalo kishte 90.29 pikë, dhe qëndronte më lart në listë se Aleksandër Toma që ka 75.57 pikë.
Në dekret Meta shkruan se vendosi ta dekretojë Përparim Kalon si anëtar të Gjykatës Kushtetuese pasi u njoh me praktikën dokumentare të miratuar nga KED si dhe duke vlerësuar nevojën jetike që ka vendi për plotësimin e funksionimin e Gjykatës Kushtetuese.
Nga sot Gjykata Kushtetuese mund të zhvillojë seanca dhe të marrë vendime, pasi tashmë ky institucion ka 6 anëtarë. Ata janë Vitore Tusha, Marsida Xhaferllari, Fiona Papajorgji, Elsa Toska, Altin Binaj dhe i fundit Përparim Kalo. Kjo Gjykatë kishte prej më thuajse 3 vitesh që nuk ishte funksionale.
Duke e përshëndetur këtë hap, Ambasadorja amerikane Yuri Kim, i ka bërë thirrje të forta palëve për të ngritur sa më shpejt Gjykatën, si një nga dy kushtet kryesore që Bashkimi Europian i ka vendosur vendit tonë për të vazhduar procesin e hapjes së negociatave.
Në Twitter ambasadorja shkruan: “Urime Popullit shqiptar. Ky është një hap gjigant përpara.”
Kujtojmë se KED i dërgoi në Presidencë paraditen e sotme emrat e Aleksandër Tomës dhe Përparim Kalos. Ky emërim i Kalos nga Presidenti vjen pasi dje është betuar Altin Binaj, anëtari i pestë i Gjykatës Kushtetuese, i cili u zgjodh nga Kuvendi seancën e së enjtes së kaluar.
Vendimmarrja në Gjykatën Kushtetuese bëhet me një kuorum prej 6 anëtarësh, ndërkohë që duhet të ketë 9 anëtarë në total, por plotësimi i tre anëtarëve të fundit pritet pas plotësimit të Gjykatës së Lartë, e cila edhe ajo nuk është funksionale.
/Gazetareforma.com/
