Një mësues është dorëhequr pasi pranoi se kishte parë përmbajtje pornografike gjatë një ore fizike me nxënës 13 dhe 14 vjeç, edhe pse ai pretendon se gjithçka ndodhi pa dashje.
Pamje të sikletshme treguan mësuesin Razif Nurgaliev, 62 vjeç, duke buzëqeshur ndërsa skena të papërshtatshme shfaqeshin në ekranin e tij – pa e kuptuar se ato po transmetoheshin edhe në monitorin e klasës, përpara syve të nxënësve.
Mësuesi, i cili kishte punuar në atë shkollë për gati 40 vjet, kishte hapur aksidentalisht materialin pornografik pasi u kishte caktuar detyra nxënësve në fshatin Tashkinovo, pranë qytetit Neftekamsk në Rusi. Ai kishte harruar që laptopi i tij ishte ende i lidhur me tabelën elektronike.
Një nxënës regjistroi momentin shqetësues nga pas një libri të fizikës.
Fillimisht, një burim nga shkolla u përpoq t’ia vinte fajin adoleshentëve, duke sugjeruar se ata kishin bërë një rreng ndaj mësuesit me përvojë. Por vetë Nurgaliev pranoi përpara autoriteteve arsimore: “Klikova diçka gabimisht dhe një faqe u hap”. Ai tha se ishte duke u përpjekur të hapte një ditar online dhe nuk e kishte qëllim të shikonte përmbajtjen eksplicite.
Drejtoresha e shkollës, Rudania Burkhanova, tha se mësuesi ishte në “gjendje shoku” pasi pamjet u bënë virale.
Megjithatë, mes zemërimit të prindërve, ai vendosi të largohej menjëherë, pavarësisht se shkolla dëshironte ta mbante për shkak të karrierës së tij të gjatë dhe të pastër deri në atë moment.
Një burim nga shkolla tha se do të ishte e vështirë të gjendej një zëvendësues për të.
“Ai ishte një mësues i vlerësuar dhe i respektuar prej gati 40 vitesh. Shfaqja e atyre imazheve ishte një aksident.” – tha shkolla në një deklaratë, duke njoftuar gjithashtu nisjen e një hetimi të brendshëm.
“Po zhvillohet një rishikim i situatës dhe komentet do të vijnë më vonë,” tha Burkhanova fillimisht. “Dua të dëgjoj të dyja palët: kam folur me fëmijët, me prindërit dhe do të flas edhe me mësuesin. Vetëm atëherë do të marr një vendim.”
Ndërkohë, një hetim nga autoritetet ligjore ka nisur në rajonin e Bashkortostanit, dhe laptopi i mësuesit është konfiskuar.
