Tashmë është zyrtare! Lionel Messi është një lojtar i Paris Saint-German, pasi kaloi edhe testet mjekësore.
Pamje të reja të Messit nga stadiumi Park de Princes kanë qarkulluar nëpër media dhe tashmë është zbuluar edhe numri që argjentinasi do të mbajë. Numri 30 do të jetë për Messin në Paris, ndryshe nga sa jemi mësuar ta shohim te Barcelona, ku ka mbajtur prej vitesh numrin 10 mbi shpinë. Në fakt, në fillimet e tij në klubin katalanas Messi ka mbajtur numrat 30 dhe 19, pasi 10-ta ishte për Ronaldinho-n. Edhe pse miku i tij Neymar i ofroi që të mbante numrin 10, siç duket argjentinasi nuk ka pranuar.
Messi mbërriti sot në Paris së bashku me familjen e tij, ku pritet vetëm zyrtarizimi si një lojtar i PSG. Ai u largua nga Barcelona pas më shumë se 20 vitesh, që kur mbërriti në akademinë “La Massia”.
Klubi e kishte të pamundur që të rinovonte me 6-herë fituesin e “Topit të Artë”, pasi rregullat e reja financiare të La Ligas nuk e lejonin pagën që parashikohej në kontratën e tij.
Në konferencën e lamtumirës nga “Camp Nou” Messi mes lotësh u shpreh se nuk dëshironte të largohej, por tashmë një aventurë e re pritet të fillojë për argjentinasin në Francë.
