Më herët ditën e sotme ministrja e arsimit Besa Shahini prezantoi platformën e mësimit që do të zhvillohet online në kuadër të masave të ndërmarra nga qeveria pas goditjes së vendit nga Covid-19.
Me anë të një statusi në Facebook, ministrja njofton se platforma quhet Akademia.al, me anë të së cilës, të gjithë nxënësit nga klasat e 6-ta e deri tek 12-a do të mund të marrin leksionet që iu duhen.
Nxënësit mjafton të regjistrohen për të pasur akses teksa për çdo pyetje, çdo nxënës mund të adresohet në këtë platformë dhe se të gjitha mësimet do të merren me anë të video-lekaioneve në Akademia.al.
“900 leksione në matematikë dhe shkenca, për klasat 6-12 i gjeni në platformën mësimore Akademi.al. Regjistrohuni sa më parë dhe aksesojini ata. Nëse keni pyetje, na shkruani këtu. Paralelisht, pyetjet më të shpeshta që nxënësit kanë për leksione të caktuara, do t’i adresojmë me video të reja nga mësuesit dhe do të publikohen këtu. Jam e lumtur të prezantoj Dean Çelaj, i cili e vuri platformën në dispozicion të të gjithë nxënësve pa pagesë. Tani, në bashkëpunim me MASR, Akademi.al do të pasurohet me video-leksione të tjera për lëndët dhe klasat që mungojnë,”- shkruan Shahini në statusin e saj.
Leksionet e matematikës nga klasa e 6-12 do të jepen në ekranin e televizionit publik nga ora 10:30-12:00, ndërsa ato të Kimisë do të transmetohen nga ora 18:00-19:30.
“RTSH Shkollë, nesër, në orën 10:30-12:00, do të zhvillohen leksionet e matematikës për klasat 6-12. Ndërsa nga ora 18:00-19:30 leksionet e kimisë për klasat 8-12 në Radio Televizionin Shqiptar – RTSH 1,”- shkruan Shahini në Facebook.
Ditën e djeshme kryeministri Rama vendosi anulimin e procesit mësimor për çdo institucion arsimor, pas shënimit të dy rasteve të para me Coronavirus në Shqipëri.
Deri tani janë 10 të infektuar, por pritet që ky numër të rritet pasi vetë ministrja e Shëndetësisë deklaroi se mund të shkojë në disa qindra të infektuar.
