Kompanitë fituese të Lotit të parë të ‘Unazës së Re’ janë “Salillari” dhe “Bajram N”.
Duke u bashkuar me njëra-tjetrën, këto kompani u shpallën fituese për shifrën e ofruar 1.77 miliardë lekë, shkruan ‘Newsbomb’.
Ndërkohë fondi limit për Lotin e parë ishte 2.25 miliardë lekë.
Vendimi u dha nga Komisioneri i Prokurimit Publik, i cili hodhi poshtë verdiktin e Autoritetetit Rrugor Shqiptar, të dhënë më datë 8 gusht.
Tenderi për Lotin e parë të ‘Unazës së Re’ është hapur tre herë, për shkak të skandalit me kompanitë “DH Albania” dhe “BibaX”, të cilat kishin hyrë në garë me dokumente të falsifikuara.
Si pasojë e këtij skandali u shkarkua ish-kreu i ARRSH, Afrim Qëndro, ndërsa demokratët kërkuan edhe largimin e Minitrit të Infrastrukturës të atëhershëm, Damian Gjiknurit.
Në garën për Lotin e parë u përfshinë 8 kompani, të cilat ishin, “2 T” SHPK & “G.P.G COMPANY”; “ALB-BUILDING” SHPK & “EUROTEOREMA” SHPK & “LIQENI VII” SHA & “COMMUNICATION PROGRES”; “CURRI” SHPK + “ALBA KONSTRUKSION” SHPK; “GENER 2”; “GJOKA KONSTRUKSION” sha & “SHANSI INVEST” shpk; “SALILLARI” SHPK & “BAJRAMI N”; “VEGA” SHPK & “ALKO IMPEX GENERAL CONSTRUCTION” dhe “VELLEZERIT HYSA” SHPK.
