Vetëvrasja është shkaktari i dytë më i madh i vdekjeve në botë tek adoleshentët.
Sipas Organizatës Botërore të Shëndetësisë, çdo vit në botë kryejnë vetëvrasje 800 mijë njerëz, shkruan “REL”
Në raportin e publikuar ditën e sotme, thuhet se norma e vetëvrasjeve për periudhën 2010-2016 ka rënë, por numri i vdekjeve është i njëjtë, për shkak të rritjes së popullsisë globale.
Drejtori i Përgjithshëm i OBSH, Tedros Adhanom Ghebreyesus, tha se çdo 40 sekonda në botë ndodh një vetëvrasje.
Sipas tij ky fenomen është i parandalueshëm, ndërsa u bën thirrje vendeve që të përfshijnë strategji të parandalimit të vetëvrasjeve, në programet kombëtare të shëndetit dhe arsimit.
Në raport sqarohet, se metodat më të përdorshme të vetëvrasjes janë vetëhelmimi dhe varja.
Për vajzat nga mosha 15-19 vjeç, vetëvrasja është shkaktari i dytë i vdekjeve, ndërsa po tek djemtë në këtë moshë, renditet si faktor i tretë.
Bazuar në raport, numri më i lartë i vetëvrasjeve ndodh në vendet me të ardhura të mesme dhe të ulëta, por normat janë më të lartë në shtetet e pasura.
