Ka reaguar gazetarja e njohur britanike Elizabeth Taylor, e cila kohët e fundit është kthyer në një temë diskutimi e komenti në mediat online, pasi disa institucione kanë refuzuar qëndrimin e saj në Shqipëri.
Në “KafeIN”, me moderatorin Flavio Qarri ajo tha se ka nisur procedurat gjyqësore për të paditur në gjykatë disa institucione dhe mes personave që do të padisë, ka përmendur dhe emrin e gazetarit dhe analistit Mero Baze që sipas saj e ka sulmuar me shkrimet e tij.
Sipas saj arsyet e sulmit janë artikujt e saj kritikë që ajo shkroi ndaj situatës politike në Shqipëri.
“Qeveria shqiptare, pasi më sulmoi mua dhe partnerin tim për shkak të punës sime si gazetare dhe kritikat e mia ndaj tyre, tani e kanë anuluar lejen e rinovimit të qëndrimit”- ka deklaruar Taylor.
Megjithatë ajo ka thënë se nuk do të largohet nga Shqipëria, e për këtë ka nisur betejën gjyqësore.
“Unë e dua Shqipërinë pavarësisht kësaj situate”, u shpreh gazetarja britanike Elisabeth Taylor.
Kujtojmë se Taylor është në pritje të një fëmije me partnerin e saj, shtetas shqiptar.
