Prokuroria e Posaçme ka përfunduar hetimet dhe ka nisur komunikimin e akuzave për anëtarët e shtatë grupeve kriminale që u goditën në kuadër të operacionit “Revanshi”.
Pas kësaj procedure, pritet që organi hetues t’i drejtohet gjykatës për seancë paraprake.
Grupet e goditura përfshinin subjekte me rekorde kriminale dhe zyrtarë të lartë, si drejtori i Policisë së Lezhës, Henerigert Mitri, si dhe figura politike si ish-deputeti Arben Ndoka dhe vëllai i deputetit Eduard Ndreca, Armando Ndreca.
Krimet e kryera nga këto grupe përfshinin aktivitete të paligjshme në territore të gjera, duke përfshirë Lezhën, Durrësin, Krujën, Tiranën, Vlorën dhe Burrelin.
Operacioni çoi në arrestimin e 20 personave, 14 prej të cilëve në Shqipëri dhe 6 jashtë saj – në Itali, Gjermani, Spanjë dhe Belgjikë.
SPAK njoftoi se ka goditur grupin kriminal të Ervis Martinajt, i cili, në aleancë me grupin e drejtuar nga Arben Ndoka dhe bashkëpunëtorë të grupit Avdyli, rekrutonin vrasës me pagesë, veçanërisht në Fushë-Krujë dhe Burrel. Po ashtu, ata kishin kontaktuar Emiljano Shullazhin, që ndodhet në burg për të realizuar vrasjen e Durim Bamit.
Një tjetër aspekt i operacionit është përfshirja e Drejtorit të Policisë së Lezhës, Henerigert Mitri, i cili drejtonte lojrat e fatit dhe mbështeste biznesmenin Pëllumb Gjoka, i cili ndodhet në arrest për dosjen “Metamorfoza”, dhe Shefin e Seksionit të Trafiqeve dhe Narkotikëve, Klodjan Shahini, i cili drejtonte kultivimin e kanabisit.
Në kuadër të operacionit, SPAK ka sekuestruar pasuri me vlerë të përafërt mbi 4,5 milionë euro, përfshirë 3 milionë euro në para cash, si dhe valixhe me florinj dhe ora.
7 grupet kriminale të shkatërruara
Ervis Martinaj Fushë-Kuqe
Arben Ndoka Lezhë
Emiljano Shullazi Durrës
Astrit Avdulaj Durrës
Durim Bami Fushë-Krujë
Duka-Hyseni Tiranë dhe Vlorë
Edison Reçi Rrëshen
