Ditën e sotme krahu i Berishës ka çuar në Gjykatën Kushtetuese marrëveshjen për Portin e Durrësit.
Ndërkohë që pasi ka dorëzuar padinë zyrtare, deputeti Oerd Bylykbashi është shprehur se marrëveshja është një megaaferë korruptive dhe një grabitje e pasurisë publike. Po ashtu, Bylykbashi ka theksuar se prapa kësaj megaafere është kryeministri Edi Rama, i cili nuk merr përbazë asnjë ligj shqiptar.
“Siç e kishim premtuar PD depozitoi në Gjykatën Kushtetuese padinë kundër megaaferës korruptive, për marrëveshjen për Portin të Durrësit. Një grabitje e tillë e pasurisë publike për interesa private nën petkun e investitorëve strategjik por me kompani offshore, pikërisht këtë ne e godasim në Gjykatën Kushtetuese, shpresojmë që Gjykata do qëndrojë në nivelin që pritet dhe të bëjë detyrën e saj”, deklaroi ai.
Theksojmë se ndërtimi i Portit të Durrësit është një temë që ka ngjallur debat dhe polemika kohët e fundit. Projekti për ndërtimin e kësaj vepre u miratua me procedurë të përshpejtuar në Paralament nga qeveria dhe kjo i dha shkasë një teme të madhe debatesh dhe denoncimesh në lidhje me të. Siç u përmend edhe më lart ishte Berisha, i cili nga foltorja e Kuvendit deklaroi se kjo është një aferë e madhe korruptive ku pas saj qëndron kryeministri Rama, Aleksandër Vuçiç dhe biznesmeni serb Bogoljub Kariç. Ai madje i bëri thirrje Bashkimit Europian që të hetojë këtë aferë. Pas Berishës edhe kreu i PL-së Ilir Meta e konsideroi projektin për Portin e Durrësit një aferë korruptive më të madhe se ajo e inceneratorëve.
