Kreu i Partisë Republikane, Fatmir Mediu ishte në një takim “kokë me kokë” me kryedemokratin Lulzim Basha sot në selinë blu. Mediu ka treguar në emisionin “Në log” në Abc News se aleatët janë në një angazhim të përbashkët. Ai bëri me dije se ka diskutuar me Bashën për procesin e manipulimit të zgjedhjeve ku secili prej tyre është i përfshirë. Mediu u shpreh se sot ka humbur Shqipëria dhe ka fituar një regjim i korruptuar.
“Të gjithë i takova. Jemi në një angazhim të përbashkët. Ishte një diskutim që bëmë për procesin e manipulimit të zgjedhjeve ku secili nga ne është i involvuar. Ajo që ka humbur sot është Shqipëria. Ka fituar një regjim i korruptuar që ka shpërbërë shtetin, vlerat dhe traditat e kësaj shoqërie dhe ka goditur vlerat e individit. Unë nuk njoh asnjë manipulim qoftë edhe të një vote të vetme. Kur të dalë rezultati i asaj që ka ndodhur në Shqipëri do të ketë një qëndrim në lidhje me këtë çështje. Jemi në proces të këtij manipulimi të madh që ka ndodhur”, ka thënë Mediu.
Kujtojmë që ditën e sotme kreu i PD Lulzim Basha pati një takim me kandidatët për deputetë të Partisë Demokratike në selinë blu. Ai i falenderoi ata për punën e bërë dhe iu kërkoi që të dilnin në terren për të takuar njerëz.
