ROMË
Një nga mediat italiane, e quajtur “Il fatto quotidiano” ka publikuar fotot nga ajri të shqiptarëve që presin në radhë për të hyrë në pikën doganore të Kakavijës e për të shkelur më tej tokën helene.
Kjo media përshkruan madje edhe realitetin social, duke thënë se shqiptarët janë më së shumti punëtorë që shkojnë drejt shtetit fqinj, Greqisë.
https://youtu.be/gWoaVYdwnBk
“Mijëra shqiptarë që punojnë në Greqi mbetën të bllokuar në kufi ndërsa përpiqeshin të hynin në vend përpara se të hynte në fuqi detyrimi për të paraqitur një test negativ për koronavirusin. Kështu raporton policia shqiptare. Në pikën kufitare të Kakavijës, në jug të Shqipërisë, u krijua një radhë prej 20 km me mbi 4000 vetura, për shkak të masave të reja të shpallura nga Athina.
Nga 16 gushti, në fakt, një maksimum prej 750 personash në ditë do të lejohen të hyjnë nga Shqipëria nëse janë të pajisur me një test negativ Covid-19 të kryer 72 orë para mbërritjes së tyre. Dhe në fund, ata do të duhet të kalojnë një javë në izolim”, shkruan media italiane në fjalë.
Më tej, në përshkrim thuhet se shqiptarët më shumë punojnë në bujqësi, në punë sezonale dhe kthehen pas 3 muajsh.
“Ministria e Jashtme shqiptare tha në një deklaratë se autoritetet greke janë impenjuar të shpejtojnë procedurën aktuale në kufi, duke shkuar nga 200 në 300 testime në orë. Situata e koronavirusit është përkeqësuar edhe në Shqipëri në 24 orët e fundit, me një numër rekord prej 154 infeksionesh. Më shumë se 210 njerëz kanë vdekur në vend për shkak të Covid-19 që nga fillimi i epidemisë. Mjekët paralajmërojnë një valë të dytë të epidemisë, ndërsa autoritetet shprehin keqardhje për mosrespektimin e masave të sigurisë nga ana e popullsisë”, shprehet Il fatto quotidiano.
Kjo media italiane ka publikuar pamjet e ANSA-s, një nga mediat më të dëgjuara në Itali.
Radha e gjatë e automjeteve në Kakavijë, u shndërrua në një problem të madh për Shqipërinë.
Një realitet tragjik ishte ai i sotmi në mëngjes, kur edhe ambulanca përplasi për vdekje një fëmijë 10-vjecar.
Për situatën kanë reaguar kryeministri Edi Rama, ministrja e Mbrojtjes Olta Xhacka dhe zyrtarë të lartë policorë.
Kreu i qeverisë Rama u shpreh se qytetarët janë dyndur për në Greqi, me shpresën që t’i shpëtojnë karantinës 14-ditore, gjë që nuk është thënë zyrtarisht nëse është apo jo kjo arsyeja e radhës së gjatë në Kakavijë.
